पीपीएलमा पोखराको विजय सुरुवात

पोखरा- पोखरा प्रिमियर लिग (पीपीएल) टी-२० मा घरेलु टोली पोखरा पल्टनले विजय सुरुवात गरेको छ । आफ्नो पहिलो खेलमा विराटनगर टाइटन्सलाई ५८ रनले पराजित गर्दै विजय सुरुवात गरेको हो । 

पोखराले दिएको १ सय ९८ रनको विजयी लक्ष्य पछ्याएको विराटनगरले निर्धारित २० ओभरमा ८ विकेट गुमाउदै १ यस ३९ रन मात्र बनाउन सक्यो । विराटनगरका लागि राजु रिजाल र पुष्प थापाले ३० समान ३० रन जोडे । यस्तै एन्ड्रयु शुबिकशनले १४ रन जोड्दा कप्तान सन्दीप लामिछानेले अविजित १४ रन जोडे ।

पोखराका ललितनारायण राजबंशीले ३ विकेट लिए । त्यस्तै मेहबुब आलाम, कृष्ण कार्की, शरद भेषावकर, विक्रम भुषाल र रासिद खानले समान १औ१ विकेट लिए ।

यसअघि टस हारेर पहिले ब्याटिङको निम्तो पाएको पोखराले मात्र ३ विकेट गुमाएर १ सय ९७ रन बनाएको थियो । राम्रो शुरुवात गरेको पोखराका लागि ओपनर कुशल भुर्तेल र मोहम्मद आरिफ शेखले ५३ रनको साझेदारी गर्दा कुशल ३८ रनमा आउट भए ।

उनले २६ बल खेल्दै ५ चौका र २ छक्काको मद्दतमा ३८ रन जोडे । अर्का ओपनर आरिफ शेख ५२ रनमा शाहव आलमको बलमा क्याच आउट भए । भारतीय खेलाडी रवि इन्दर सिंह ४४ रनमा आउट भए । आक्रमक पारी खेलेका विनोद भण्डारी ४१ रनमा नटआउट रहे । 

भण्डारीले ११ बलमा ५ छक्का र २ चौकाको मद्दतमा ४१ रन बनाउदा कप्तान शरद भेषवाकर ७ रनमा नटआउट रहे । विराटनगरका सन्दिप लामिछानेले २ तथा शाहव आलमले एक विकेट लिए ।