नक्कली शरणार्थी प्रकरण : शंकाको सुई अख्तियारका प्रमुख आयुक्त राई र प्रहरी प्रमुख कुँवरतिर

काठमाडौं- नक्कली शरणार्थी प्रकरणमा राजनीतिक नेक्ससलाई बलियो बनाउन गृह मन्त्रालयको कर्मचारी संयन्त्र प्रयोग भइरहेका समाचार बाहिरिएकै बेला मुलुकको पहिलो शान्ति–सुरक्षा अंग प्रहरी संगठनसमेत बदनामीको बाटोमा पुगेको छ।

प्रहरी संगठन हाँक्ने आईजीपी वसन्त कुँवर मात्रै नभएर मुलुकलाई सुशासनको बाटोमा हिँडाउने जिम्मेवारीमा रहेका अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईसमेत नक्कली शरणार्थी धन्धामा संलग्न रहेको समाचार बाहिरिएका छन्। प्रमुख आयुक्त राई यसअघि वाइडबडी काण्डमा भ्रष्टाचारमा डामिएका पात्र हुन्।

हाल अख्तियार प्रमुख रहेका राईले गृह मन्त्रालयमा सचिव छँदा तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजीत राईमार्फत नक्कली शरणार्थी प्रकरणमा रकम कुम्ल्याएको बताइएको छ। यो कुराको जानकारी पक्राउ परेका इन्द्रजीतले प्रहरीलाई दिएका हुन्। 

भ्रष्टाचार हालका प्रहरी महानिरीक्षक वसन्त कुँवर नक्कली शरणार्थी प्रकरणमा रकम खानेमध्येका एक जना भएको घटनामा पक्राउ परेका केशव दुलाल र तत्कालीन गृहसचिव टेकनारायण पाण्डेबीचको फोन कुराकानीले पोल खोलिदिएको हो। दुलाल र पाण्डेबीच भएको टेलिफोनमा हालका आईजीपी कुँवरको नाम जोडिएपछि गृह मन्त्रालयमा बैठक बस्नुपर्ने अवस्था सिर्जिएको छ। 

नक्कली शरणार्थी प्रकरण छानबिनमा खटिएको प्रहरी टोलीले सरकारी वकिल कार्यालय काठमाडौंलाई बुझाएको छानबिन कागजात (मिसिल) मा तत्कालीन गृहसचिव पाण्डे र गिरोहका मुख्य सदस्य दुलालबीच भाइबरमा भएको कुराकानीको केही अंशमा आईजीपी कुँवरको नामसमेत लिइएको छ। 
८ असार २०७९ मा भएको कुराकानीको स्क्रिनसटमा केशव दुलालले सचिव टेकनारायण पाण्डेलाई भाइबरमा पठाएको म्यासेजमा ‘सर, वसन्त सरलाई पनि फाइनान्सियल सपोर्ट हुन्छ भनिदिँदा हुन्छ हजुर’ भनेका छन्। त्यसको प्रतिउत्तर दिँदै पाण्डेले ‘हुन्छ’ भनेर जवाफ फर्काएको देखिएको छ।

यद्यपि आईजी कुँवरले आरोप प्रमाणित भए जेल जान तयार रहेको र उक्त घटनामा आफ्नो संलग्नता नभएको दाबी गरेका छन्। आईजीपी कुँवरले भनेका छन्, ‘यो प्रकरणमा अनुसन्धान गर्नुपर्छ भनेर मैले नै भनेको हुँ। संगठनको छवि उचो राख्न प्रहरीले यति धेरै मिहिनेत गरेकैले अहिलेसम्मको सफलता मिलेको हो। तर प्रहरीभित्रै फाटो ल्याउन र विवादमा ल्याउन यस्ता कुरा गरिएका हुन्। मैले आफ्नो कर्तव्य र जिम्मेवारी पूरा गरेको छु। कसैले गलत पुष्टि गर्न सक्छ भने जेल जान तयार छु।’

नक्कली शरणार्थी प्रकरणमा आईजीपी कुँवर संलग्नताबारेका समाचार बाहिरिएपछि उपप्रधान तथा गृहमन्त्री नारायणकाजी श्रेष्ठले यतिखेर सिंहदरबारस्थित गृह मन्त्रालयमा बैठक बोलाएका छन्। गृहमन्त्रीले सम्भवतः आईजीपीबारे कुनै निर्णय लिन सक्ने अनुमान गरिँदै छ।  

नक्कली भुटानी शरणार्थी प्रकरणका आरोपित सानु भण्डारीको बयानमा तत्कालीन गृहसचिव तथा हालका अख्तियार प्रमुख प्रेम राईको पनि नाम मुछिएको छ। अख्तियारका प्रमुख आयुक्त प्रेम कुमार राईको गाडीमा १ करोडको थैलो राखिदिएको प्रहरी बयानमा उनले पोल खोलिदिएका छन्। 

भण्डारीले अख्तियारका प्रमुखको नाम पोल पनि प्रहरीले उनीसँग सोधपुछ भने गरेको छैन। कर्मचारी र राजनीतिक दलका शीर्ष नेतृत्वको मिलेमतोमा मुलुकमा भ्रष्टाचार बढिरहेको नागरिकको गुनासो आइरहेका बेला राईलाई राजनीतिक लाभहानिका आधारमा अख्तियारको जिम्मा लगाइएको दाबी गरिँदै आएको छ। वाइडबडी काण्डमा समेत अनियमितता गरेको दाबीसहितको प्रमाण उनीमाथि रहे पनि अख्तियार प्रमुख बनाएर भ्रष्टाचारलाई बढावा दिने काम राजनीतिक दलले गरेका थिए।