विभिन्न घटनामा १० जनाको मृत्यु

काठमाडौं- देशभर भएका विभिन्न घटना-दुर्घटनामा १० जनाको ज्यान गएको छ। प्रहरीका अनुसार पछिल्लो २४ घण्टामा उनीहरुको मृत्यु भएको हो।

मकवानपुर, मनहरी गाउँपालिका-६ नयाँबस्तीस्थित सडकमा ना.५ख १७४० नम्बरको बसको ठक्करबाट पैदलयात्री हाल नाम, थर, वतन नखुलेकी अन्दाजी ६२ वर्षीया महिलाको गएराति मृत्यु भएको छ। ठक्करबाट गम्भीर घाइते भएकी उनको हेटौंडा अस्पतालमा उपचारको क्रममा मृत्यु भएको हो। प्रहरीले बस चालकलाई नियन्त्रणमा लिई यस सम्बन्धमा थप अनुसन्धान गरिरहेको
छ।

अछाम, मेल्लेख गाउँपालिका-४ सेलगाँउ बस्ने २५ वर्षीय सर्जने साउदको करेन्ट लागेर मंगलबार दिउँसो मृत्यु भएको छ। सोही ठाउँस्थित हात्तीकोटदेखि सेलगाउँतर्फ बिजुलीको लाइन बिस्तार गर्ने क्रममा करेन्ट लागेर उनको घटनास्थलमै मृत्यु भएको हो। रुपन्देही, शुद्धोधन गाउँपालिका-४ फर्साटिकरस्थित पराजुलि ग्रिल उद्योगमा काम गर्ने सोही ठाउँ बस्ने २८ वर्षीय पवन थारुको करेन्ट लागेर मंगलबार दिउँसो मृत्यु भएको छ। सोही ठाउँ बस्ने रिया थारुको घरमा ग्रिलको काम गर्ने क्रममा करेन्ट लागेर गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो।

सिरहा, गोलबजार नगरपालिका-१३ सिमरा टोल बस्ने ५५ वर्षीय देवनाथ यादवको आफ्नै खेतमा मोटर जडान गर्ने क्रममा करेन्ट लागेर मंगलबार दिउँसो घटनास्थलमै मृत्यु भएको छ। 

सप्तरी, महदेवा गाउँपालिका-६ ढिक्कली टोल बस्ने २५ वर्षीय जवाहर मण्डलको करेन्ट लागेर मंगलबार बिहान मृत्यु भएको छ। आफनै घरको जस्ता छाउने क्रममा करेन्ट लागेर गम्भीर घाइते भएका उनको छिन्नमस्ता अस्पताल राजबिराजमा उपचारको क्रममा मृत्यु भएको हो। यस सम्बन्धमा प्रहरीले थप अनुसन्धान गरिरहेको छ।

इलाम, इलाम नगरपालिका-३ तल्लो खत्री गाउँ बस्ने ७५ वर्षीया चन्द्र माया न्यौपाने आफ्नै घरमा मंगलबार मृत अवस्थामा फेला परेकी छिन्।

भोजपुर, षडानन्द नगरपालिका-१४ बिहिबारे मगर टोल बस्ने ६८ वर्षीय तिखे सार्की सोही ठाउँस्थित बाटो‍को नालीमा बुधबार मृत अवस्थामा फेला परेका छन्। यस सम्बन्धमा प्रहरीले थप अनुसन्धान गरिरहेको छ।

बाँके डुडुवा गाउँपालिका-५ राप्ती नदीमा पौडी खेल्ने क्रममा डुबेर नेपालगञ्ज उपमहानगरपालिका-१२ कोरियनपुर बस्ने २५ वर्षीया सरिता चौधरी र कोहलपुर नगरपालिका-२ बस्ने २९ वर्षीया शारदा बस्नेतको मंगलबार साँझ मृत्यु भएको छ। पौडी खेल्ने क्रममा डुबेर अशक्त भएका उनीहरूको भेरी अस्पताल नेपालगञ्ज बाँकेमा उपचारको क्रममा मृत्यु भएको हो।

रौतहट, मौलापुर नगरपालिका-४ पतौरा बस्ने ३५ वर्षीया प्रतिमा देवी शाहको चट्याङ लागेर मंगलबार बिहान मृत्यु भएको छ। आफ्नै गोठ नजिकै रहेको धारामा पानी लिन जाँदा चट्याङ लागेर उनको मृत्यु भएको हो।