नक्कली शरणार्थी प्रकरण: ओलीका स्वकीय सचिव मुछिए, आईजीपीको भूमिका शंकास्पद

काठमाडौं- जिल्ला सरकारी वकिलको कार्यालय काठमाडौंले नक्कली भुटानी शरणार्थी ठगी प्रकरणमा अभियोजन अदालतमा दर्ता गर्ने अन्तिम तयारी गरिरहँदा नयाँ नामहरु बाहिर आएका छन्। यो प्रकरणमा पक्राउ परेकाहरुले बयानका क्रममा अन्यलाई पनि पोलेका हुन्।

अख्तियार दुरुपयोग अनुसन्धान आयोगका प्रमुख आयुक्त तथा पूर्व गृहसचिव प्रेमकुमार राई र एमाले अध्यक्ष केपी ओलीका स्वकीय सचिव राजेश बज्राचार्य यसमा मुछिएका हुन्। नेपाल प्रहरीका आईजीपी वसन्त कुँवरको भूमिकासमेत यो प्रकरणमा शंकास्पद देखिएको विवरणहरु सार्वजनिक भएका छन्।

सानु भण्डारी र केशव दुलालले उच्चपदस्थहरुलाई रकम बुझाएको बयान दिएको प्रहरीले तयार गरेको अनुसन्धान प्रतिवेदनमा उल्लेख छ। तत्कालीन राईलाई रकम बुझाएको बयान आरोपी भण्डारीले दिएका छन्। रामबहादुर थापा बादलका सुरक्षा सल्लाहकार इन्द्रजित राईले प्रेमकुमारको गाडीमा एक करोड रुपैयाँ राख्न लगाएको भण्डारीले खुलाएका छन्। त्यतिबेला बादल गृहमन्त्री र राई सचिव थिए।

केशव दुलालले पनि बादलले मन्त्री क्वार्टरमै रकम बुझेको दाबी गरेका छन्। बादलले ३ करोड र प्रेमकुमारले ३ करोड लिएको बयान उनले दिएका छन्।

तत्कालीन प्रधानमन्त्री ओलीका प्रमुख स्वकीय सचिव राजेश बज्राचार्यले भने उर्जामन्त्री टोपबहादुर रायमाझीका प्रमुख स्वकीय सचिव लीला जिसीमार्फत प्रधानमन्त्री क्वार्टर बालुवाटारमा बोलाएर एक करोड रुपैयाँ लिएको बयान आरोपीहरुले दिएका छन्। ओलीका पूर्वसल्लाहकार डा. अजयक्रान्ति शाक्य र काठमाडौं महानगरका तत्कालीन मेयर विद्यासुन्दर शाक्यका निजी सचिव राजेश्वर स्थापितले पनि एक/एक करोड रुपैयाँ बुझेको दुलालको दाबी छ।

यो प्रकरणमा प्रहरीले पूर्वमन्त्री रायमाझी र पूर्व सुरक्षा सल्लाहकार राईलाई पक्राउ गरे पनि सानु र केशवले पोलेका एमाले अध्यक्ष ओलीका प्रमुख स्वकीय सचिव बज्राचार्य, तत्कालिन गृहमन्त्री एवं एमाले उपाध्यक्ष बादल, पूर्वगृहसचिव एवं हाल अख्तियारका प्रमुख आयुक्त रहेका राई, डा. अजयक्रान्ति शाक्य, राजेश्वर स्थापितलगायतसँग सामान्य सोधपुछ पनि गरेको छैन।

यो प्रकरणमा सर्वाधिक नाम आइरहेका आरजु राणा देउवा र मञ्जु खाणलाई पनि कुनै पनि आरोपीले बयानका क्रममा पोलेका छैनन्। केही समयअघि सार्वजनिक भएको एक अडियोमा मञ्जु र आरजुको पनि नाम मुछिएको थियो। उनीहरुलाई पनि रकम दिएको भन्दै आरोपी सन्देश शर्माले पीडित गजेन्द्र बुढाथोकीलाई बताएको अडियो सार्वजनिक भएको थियो।

सानु भण्डारी र केशव दुलालले उच्चपदस्थहरुलाई रकम बुझाएको बयान दिएको प्रहरीले तयार गरेको अनुसन्धान प्रतिवेदनमा उल्लेख छ।

यता नक्कली भुटानी शरणार्थी प्रकरणमा प्रहरी महानिरीक्षक (आईजीपी) वसन्तबहादुर कुँवरको भूमिका पनि शंकास्पद देखिएको विववरणहरु सार्वजनिक भइरहेका छन्। गिरोहका सदस्य केशव दुलाल र सानु भण्डारीसँग कुँवरको सम्पर्क र भेटघाट भएको अनुसन्धानका क्रममा भेटिएको हो। प्रहरीले अनुसन्धानका क्रममा दुलालको मोबाइलबाट तत्कालीन गृहसचिव टेकनारायण पाण्डेसँग भएको भाइबर च्याटको विवरण फेला पारेको छ, जसमा पाण्डेले कुँवरसँग गिरोहलाई जोडिदिएको खुलेको छ।

भेटका लागि पाण्डेले सहजीकरण समेत गरिदिएको पाइएको छ। त्यसबेला कुँवर डीआईजी थिए। उपत्यका अपराध अनुसन्धान कार्यालयको प्रमुख छँदा यो प्रकरणमा शक्तिशाली मानिसहरु जोडिएपछि कुँवरले अनुसन्धानको फाइल नै घरमा लगेको खुलेको छ। एसएसपीका रुपमा कुँवर अपराध अनुसन्धान कार्यालयको प्रमुख छँदा १८ जेठ २०७९ मा यो प्रकरणबारे पहिलो पटक उजुरी परेको थियो।

गृह मन्त्रालयका उच्च अधिकारीहरुसँग सम्पर्क रहेको व्यहोरासहित जाहेरी परेपछि प्रहरीले अनुसन्धानका लागि ललितपुरका सानु भण्डारी र पाँचथरका टंक गुरुङलाई नियन्त्रणमा लिएको थियो। त्यही दिन जिल्ला अदालत काठमाडौंबाट पक्राउ पुर्जी लिएर पक्राउ गरिएका उनीहरुलाई तत्कालीन कार्यालय प्रमुख कुँवरले केही घन्टामै गृह मन्त्रालयको दबाबमा छाडेको खुलेको छ। 

आज मुद्दा दर्ता गरिँदै
जिल्ला सरकारी वकिलको कार्यालय काठमाडौंले नक्कली भुटानी शरणार्थी–ठगी प्रकरणमा बुधबार अदालतमा अभियोजन दर्ता गर्ने गरी अन्तिम तयारी गरिरहेको छ। 

अभियोजनका लागि गठित आठ सदस्यीय समितिले सोमबार प्रहरीले बुझाएको रायसहितको प्रतिवेदन अध्ययन गरी अभियोजनपत्र तयार गरिरहेको कार्यालयका प्रमुख सहन्यायाधीवक्ता अच्युतमणि न्यौपानेले जानकारी दिए।

उनले भने, 'बुधबार मुद्दा दर्ता गर्ने गरी अध्ययन गरिरहेका छौँ, प्रहरीको रायमाथि केही थपघट गरेर अभियोजन दर्ता हुनसक्छ। अहिले अध्ययनकै चरणमा रहेकाले यही हुन्छ भन्ने अवस्था छैन।' जिल्ला प्रहरी परिसर काठमाडौँले नक्कली भुटानी शरणार्थी बनाएर अमेरिका पठाउने लोभमा सयौँ नागरिकको करोडौँ रकम ठगी गरेको घटनाको अनुसन्धान प्रतिवेदन सोमबार जिल्ला सरकारी वकिलको कार्यालयलाई बुझाएको थियो।

नक्कली शरणार्थी प्रकरणमा ५८औं दिन लामो अनुसन्धान सकेर प्रहरीले सरकारी वकिलको कार्यालयमा रायसहितको प्रतिवेदन बुझाएको थियो। प्रहरी हिरासतमा रहेका १६ जनासहित ३३ जनालाई प्रतिवादी बनाइएको छ भने २७ करोड ८४ लाखबढी विगो दाबी गरिएको छ।

उक्त घटनामा पूर्वमन्त्री, सचिवसहितका १६ जना पक्राउ परेका छन्। अरु थप १७ जनालाई प्रतिवादी भनाएर मुद्दा चलाउने राय दिइएको परिसरका प्रहरी उपरीक्षक सीताराम रिजालले बताए। प्रहरीका अनुसार ठगी, राज्य विरुद्धको अपराध र सङ्गठित ठगीमा मुद्दा चलाउन सकिने राय प्रहरीको छ। उक्त घटनामा थप अनुसन्धानको पाटो खुला नै रहेको पनि रिजालले बताए। यस्तै सम्पत्ति शुद्धीकरण र अख्तियार दुरुपयोगमा पनि अनुसन्धान गर्न लेखी पठाउन राय दिइएको छ।

उक्त घटनामा ६० दिनभित्रमा अभियोजन गरिसक्नुपर्छ। बुधबार नै ६० दिन पुग्दैछ। यस घटनामा एक सय १३ जना पीडितले २७ करोड ५० लाख ठगी भएको भनी उजुरी दिएका थिए। सोही आधारमा बिगोसमेत हुने गरी अभियोजन गर्न राय दिइएको प्रहरीले जनाएको छ।  

शरणार्थी प्रकरणमा तत्कालीन गृहमन्त्री बालकृष्ण खाण, नेकपा (एमाले) का निलम्बित सचिव पूर्वउपप्रधानमन्त्री टोपबहादुर रायमाझी, तत्कालीन गृहसचिव (निलम्वित सचिव) टेकनारायण पाण्डे, भुटानी शरणार्थी नेता टेकनाथ रिजाल, तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, हज समितिका अध्यक्ष शमशेर मियाँ, पूर्वसभासद आङटावा शेर्पा, तत्कालीन गृहमन्त्री खाणका स्वकीय नरेन्द्र केसी, सन्दीप रायमाझीसहित केशव दुलाल, सानु भण्डारी, सन्देश शर्मा, सागर राई, टङ्क गुरुङ, गोविन्द चौधरी र रामशरण केसी पक्राउ परेका छन्। 

पूर्वगृहमन्त्री रामबहादुर थापाका छोरा प्रतीक, इन्द्रजित राईका छोरा नीरजसहितका १७ जना फरार छन्।