करेन्ट लागेर महिलाको मृत्यु

जनकपुरधाम- महोत्तरीको औरहीमा करेन्ट लागेर एक महिलाको ज्यान गएको छ। 

बिहिबार आफ्नै कुखुरा फर्ममा दाना हाल्न गएकी औरही नगरपालिका-९ इनर्वाकी ४० वर्षीया मिना देवी सहनीको करेन्ट लागेर मृत्यु भएको हो। हिंस्रक जनावरबाट कुखुरालाई जोगाउन फलामे तारको घेरामा जडान गरिएको विद्युतीय धरापमा परेर सहनीको मृत्यु भएको प्रहरीले जनाएको छ।

यसैगरी घटनामा सहनीका श्रीमान सुरेश सहनी र ४ वर्षीय भतिज राजा सहनी घाइते भएका छन्। 

विद्युतीय धरापमा परेका भतिज राजालाई बचाउन खोज्दा सहनीको घटनास्थलमै मृत्यु भएको जिल्ला प्रहरी कार्यालय महोत्तरीका डीएसपी खगेन्द्रबहादुर खड्काकले बताए। सहनीलाई बचाउन पुगेका उनका श्रीमान सुरेश घाइते भएको उनले जानकारी दिए। घाइते दुवैजनाको जनकपुर अञ्चल अस्पतालमा उपचार भइरहेको प्रहरीले जनाएको छ।