भोलीबाट सुरु हुने पीपीएलको ट्रफी सार्वजनिक

पोखरा- पोखराको फेवा तालकोबीचमा रहेको तालबाराही मन्दिरमा पोखरा प्रिमियर लिग क्रिकेट ‘पीपीएल’को ट्रफी सार्वजनिक गरिएको छ । ट्रफी सहभागि ६ वटै टोलीका मार्की प्लेयर तथा कप्तानले संयुक्त रुपमा सार्वजनीक गरेका हुन् । 

ट्रफी सार्वजनिक कार्यक्रममा पोखरा पल्टनका शरद भेषावकर, चितवन राइनोजका पारस खड्का, काठमाडौं रोयल्सका ज्ञानेन्द्र मल्ल, विराटनगर टाइटन्सका सन्दीप लामिछाने, बुटवल ब्लास्टर्सका सोमपाल कामी र एक्स्पर्ट धनगढी ब्लुजका दीपेन्द्रसिंह ऐरीले सहभागिता जनाएका थिए ।

शुक्रबारबाट शुरु हुने प्रतियोगिताको उद्घाटन खेलमा विराटनगर टाइटन्स र पोखरा पल्टनबीच प्रतिस्पर्धा हुनेछ । प्रतियोगितालाई अन्तर्राष्ट्रिय क्रिकेट परिषद आईसीसीले मान्यता प्रदान गरिसकेको छ ।

प्रतियोगिताको विजेताले २७ लाख र उपविजेता टोलीले १० लाख रुपैयाँ प्राप्त गर्ने छन् । प्रतियोगिताको म्यान अफ द सिरिज, उत्कृष्ट ब्याट्सम्यान र उत्कृष्ट बलरहरुलाई भीजी अटोमोबाइल्सको तर्फबाट सुजुकी जिक्सर १ सय ५५ सीसी मोटरसाइकल प्रदान गरिने छ ।