व्यापार र व्यवहार मिलाउन भन्दै ८ करोड २५ लाख ठगी

काठमाडौं- सिन्धुलीको गोलन्जर गाउँपालिका वडा नम्बर ४ स्थायी घर भएका कृष्णमुरारी गुरुङले आफ्नो व्यवहार र व्यापार मिलाउन भन्दै विभिन्न व्यक्तिबाट ८ करोड २५ लाख रुपैयाँ ठगी गरेका छन्।

पीडितहरुको उजुरीका आधारमा प्रहरीले उनलाई पक्राउ गरेको छ। मुद्दा परेकाले आफ्नो सम्पूर्ण सम्पत्ति रोक्का भएको भन्दै उनले पटक-पटक गरी एकै जनासँग नगद ७ करोड ७५ लाख र २० तोला सुन लिएको प्रहरीको भनाइ छ। प्रहरीले उनलाई ठगी, आपराधिक लाभ तथा आपराधिक विश्वासघातसम्बन्धी कसुरमा अनुसन्धान प्रक्रिया अघि बढाएको छ।

गुरुङ कांग्रेस महासमिति सदस्यसमेत हुन्। उनी गत प्रतिनिधिसभा निर्वाचनमा सिन्धुली-१ बाट उम्मेदवारको दाबेदार भए पनि कांग्रेसले श्यामकुमार घिमिरेलाई टिकट दिएको थियो।

गुरुङले अखिल नेपाल फुटबल संघ (एन्फा) को गत असारमा भएको निर्वाचनमा केन्द्रीय सदस्य पदका लागि उम्मेदवारी दिएका थिए। उनी 'हाम्रो नेपाल' नामक फुटबल समर्थक संस्था पनि चलाउँछन्।