चितवनमा बस पल्टियो : चालकसहित ३ जनाको मृत्यु

चितवन- विजयादशमीको एकाविहानै चितवनमा बस पल्टिदा ३ जनाको मृत्यु भएको छ भने २३ जना घाइते भएका छन् ।  

चितवनको इच्छाकामना गाउँपालिका ६ जलविरेमा बिहीबार विहान साढे २ बजे बस दुर्घटना हुँदा चालक सहित ३ जनाको मृत्यु भएको हो । काँकडभिट्टाबाट पोखराका लागि छुटेको  ना ५ ख ४३ ८३ नम्बरको बस सडकबाट करिब ५० मिटर तल खस्दा दुर्घटना भएको प्रहरीले जनाएको छ । 

दुर्घटनामा परि ज्यान गुमाउने मध्ये झापाको मेची नगरपालिका–८ का चालक उदयमान राजवंशीको शनाखत भएको छ भने बाँकी २ जना पुरुषको शनाखत हुन नसकेको जिल्ला प्रहरी कार्यालय चितवनले जनाएको  छ। 

घाइते २३ जनाको अवस्था खतरा मुक्त रहेको छ भने एकजनाको नयाँ मेडिकल कलेज र बाँकी २२ जनाको पुरानो मेडिकल कलेज भरतपुरमा उपचार भइरहेको प्रहरीले जनाएको छ । 

घुम्तिमा चालकले गाडी काट्न नभ्याएका कारण दुर्घटना भएको हुनसक्ने प्रहरीको प्रारम्भिक अनुमान छ । रातिको समयमा चालक निदाएका कारण पनि दुर्घटना भएको हुनसक्ने प्रहरीले जनाएको छ ।