राजदेवीमा एकैरातमा १५ हजार बोका काटिए 

जनकपुरधाम- जनकपुरको राजदेवी मन्दिरमा एकैरातमा १४ हजार ९९७ बोकाबली दिइएको छ । यो अघिल्लो वर्षको तुलानामा २ हजार ६९० ले बढि हो । गत वर्ष यो संख्या १२ हजार ३०७ थियो ।

विजया दशमी अन्तर्गत महाष्टमीको राती भएको बोकाबलीमा यो संख्यावृद्धि भएको हो । राजदेवी मन्दिरमा यस वर्ष महाष्टमीको राती १४ हजार ९९७ बोकाबली भएको पूजा समन्वय गर्दै आइरहेको महावीर युवा कमिटीका महासचिव अजयकुमार गुप्ताले जानकारी दिए । 

राजा जनकको कुलदेवता मानिएको राजदेवी मन्दिरमा वर्षमा एक दिनमात्र महाष्टमीको राती बोकाबली हुने गरेको छ । बुधबार साँझ करिब साढे सातबजे शुरु भएको बोकाबली बिहान ३ बजेसम्म चलेको थियो । बोकाबलीका लागि ठुलो लाम भएपछि समयमै व्यवस्थापन गर्न मन्दिरभित्र चारस्थानमा बोकाबली दिइएको थियो ।

बुधबार राती हुने बोकाबलीका लागि श्रद्धालुहरु बिहानैबाट लाम लागेका थिए । राजदेवी मन्दिरमा बोकाबलीका लागि धनुषा, महोत्तरी, सिरहा, सर्लाहीलगायतका जिल्लाका साथै भारतबाट समेत श्रद्धालुहरु आउने गर्दछन् । राजदेवी मन्दिरमा बोकाबली गरेपछि भाकल पुरा हुने जनविश्वास रहेको छ ।

महाष्टमीको राती हुने बोकाबलीलाई व्यवस्थित रुपमा सम्पन्न गर्न स्थानीय युवा क्लबका पाँच सय भन्दा बढी युवाहरु परिचालित गरिएको थियो ।