छोरी आएपछि कांग्रेस नेता बास्तोताको आजै अन्तेष्टि गरिने

काठमाडौं- नेपाली कांग्रेसका नेता चक्र बास्तोलाको आइतबार साँझ अन्तेष्टि गरिने भएको छ । मस्तिष्काघात भएर ६ वर्षदेखि थलिएका बास्तोलाको शनिबार राति निधन भएको हो । 

बास्तोलाको पार्थिव शरिरलाई अन्तिम श्रद्धान्जलीका लागि आइतबार दिउँसो १ देखि ४ बजेसम्म पार्टी कार्यालय सानेपामा राखिदैछ । पार्टी कार्यलयमा विभिन्न दलका शीर्ष नेता र कार्यकर्ताहरुले श्रद्धान्जली दिने कार्यक्रम छ । 

श्रद्धान्जली पछि आजै पशुपति आर्यघाटमा अन्तेष्टि गरिने पारिवारिक स्रोतले जनाएको छ । बास्तोका दुई छोरी मध्ये एक छोरी वेलायतबाट आउदैछिन् । उनी आएपछि साँझ अन्तेष्टि गरिने जनाइएको छ । 

बास्तोलाको उपचारमा संलग्न न्युरो अस्पताल बाँसबारीका चिकित्सकहरूले शनिबार दिउँसै उनको ‘क्लिनिकल्ली डेथ’ भएको घोषणा गरेपछि परिवारले खुमलटारस्थित निवासमा लगेको थियो । उनलाई भेट्न कांग्रेस सभापति शेरबहादुर देउवा, उपसभापति विमलेन्द्र निधि, महामन्त्री डा शशांक कोइराला, सहमहामन्त्री डा प्रकाशशरण महतसहितका नेताहरू खुमलटार पुगेका थिए । 

भारतका लागि नेपाली राजदूतसमेत भएका बास्तोला परराष्ट्रमन्त्रीसम्म बनेका थिए । उनी ०४८ मा भारतका लागि राजदूत बने भने ०५२, ०५५, ०५६ र ०५७–५८ गरी चारपटक मन्त्री भएका थिए ।