काठमाडौं- दार्चुलाको नौगाड गाउँपालिका-४ स्थित बौलासल्याडमा एक किशोर र एक किशोरी मृत भेटिएका छन्। उनीहरु अन्दाजी १६-१७ वर्ष उमेरका रहेको प्रहरीले जनाएको छ।
मृत भेटिनेमा जितेन्द्र ठगुन्ना र सञ्चिता धामी हुन्। प्रहरीको प्रारम्भिक अनुसन्धानबाट उनीहरू प्रेम सम्बन्धमा रहेको खुलेको छ।
बिहीबार बिहान ती किशोर र किशोरीलाई घटनास्थल नजिकै देखेको स्थानीयले बताएका छन्। प्रहरीका अनुसार किशोरीको शवमा चोटपटक लागेको देखिएको छ भने जितेन्द्रको शव किशोरीको भन्दा करिब ४० मिटर तल भीरमा अड्किएको अवस्थामा फेला परेको छ।
घटनास्थलमा दुइटा मोबाइल पनि फेला परेका छन्।