सामाजिक सञ्जालले गलायो, निर्वाचन लड्न डराए वामदेव

काठमाडौं–राजधानीबाट बिहीबार प्रकाशित दैनिक पत्रपत्रिकाले सत्तारुढ दल नेकपाका नेता  वामदेव गौतम काठमाडौं क्षेत्रनम्बर सातबाट निर्वाचन लड्ने भन्ने मनस्थितिबाट पछि हटेको समाचारलाई प्राथमिकतामा राखेका छन् ।

कान्तिपुर दैनिकले पछि हटे गौतम शीषर्कमा लेखेको समाचारमा पार्टी भित्रैको तीव्र विरोध, क्षेत्र तथा स्थानीय नेता, सर्वसाधारणको व्यापक आलोचनापछि उनी आफ्नो निर्णयबाट पछि हटेका हुन् ।

कार्यालय व्यवस्थापन र दरबन्दी मिलान नहुँदा प्रदेश कर्मचारीको दशैं खल्लो भएको, दशैंमा पनि हजारौ कर्मचारीले तलबभत्ता नपाएको, टपरीमा रैथाने स्वादलगायतका समाचार कान्तिपुरको मुख्य पृष्ठमा छन् । 

नयाँ पत्रिका दैनिकले पनि वामदेव प्रसंगको समापन शीर्षकमा लेखेको समाचारमा काठमाडौं सातका नेताहरुलाई वामदेवले फोन गरेर सद्भावनाका लागि धन्यवाद दिँदै चुनावमा नउठ्ने बताएको, पार्टी कै शीर्ष नेता कार्यकर्ताको असन्तुष्टि र सामाजिक सञ्जालको विरोधले वामदेवलाई गलाएको, स्थानीय तहलाई केन्द्रको हेपाई बढेको, दरबन्दीको आधा पनि कर्मचारी व्यवस्थापन गर्न नसकेको, टेलिफोन गर्न पाखेलो पर्खनुपर्ने फोन गर्दा १० र उठाउँदा पाँच रुपैयाँ प्रतिमिनेट तिर्नुपर्ने हुम्लाबासीको नियती, सरकारी निर्णयविपरीत सांसदलाई भत्तालगायतका खबरलाई प्राथमिकताका साथ छापेको छ । 

अन्नपूर्ण पोस्टले पनि हच्किए गौतम शीर्षकमा वामदेव उपनिर्वाचनबाट पछि हटेको समाचारलाई प्राथमिकतामा छापेको छ । प्रधानमन्त्री सांसदको स्याउबारी हेर्न मनाङ पुगेको, चिनीमा चलखेल भएको र छानबिन गर्न अख्तियारको ध्यानाकर्षण गराईएको खबरलाई प्राथमिकतामा छापेको छ ।