‘ए’ डिभिजन लिग : पुलिसको विजय शुरुवात

काठमाडौं- सहिद स्मारक ‘ए’ डिभिजन लिग अन्तर्गत बिहीबार भएको खेलमा नेपाल पुलिस क्लबले जावलाखेल युवा क्लबलाई १-० ले  पराजित गरेको छ । यससँगै पुलिसले लिगमा सुखद शुरुवात गरेको हो । 

पुलिसका लागि पहिलो हाफको ३२ औं मिनेटमा अजित भण्डारीले गोल गरेका थिए । पुलिसले पेनाल्टी क्षेत्रबाहिर पाएको फ्रिकिकमा उत्कृष्ट टिमवर्कको नमुना प्रस्तुत गर्दै गोल गरेको हो । 

त्यसअघि जावलाखेलका गोलरक्षक टिकेन्द्र थापाले पुलिसको दुई सुन्दर प्रयासलाई विफल बनाएका थिए । सुमन लामाले ६ यार्ड भित्रबाट गरेको प्रहार उनले रोकेका थिए । दोस्रो हाफमा जावलाखेलले केहि सुधारिएको प्रदर्शन गर्यो । 

त्यस क्रममा जावलाखेलले बराबरी गर्ने मौकाको सदुपयोग गर्न सकेन । ७५ औं मिनेटमा पुलिसका अजितबाट वैकल्पिक खेलाडी सुमन डंगोलले बल खोसेपछि प्रज्वल थापामगरले पेनाल्टी क्षेत्रभित्र वन भर्सेस वनमा गोल गर्न सकेनन् ।

सुमन लामाले पेनाल्टी बक्सको छेउबाट गरेको प्रहार सिधै गोलरक्षकको हातमा पुग्यो । ८० औं मिनेटमा अभिषेक रिजालको लो क्रसमा सुमनले पेनाल्टी क्षेत्रभित्र बल छुन सकेनन् ।