थ्रीस्टारसँग फ्रेन्ड्स क्लब २-१ ले पराजित  

काठमाडौं- सहिद स्मारक ‘ए’ डिभिजन लिग अन्तर्गत बिहिाबार भएको खेलमा फ्रेन्ड्स क्लब थ्रीस्टारसँग पराजित भएको छ । फ्रेन्ड्स थ्रीस्टारविरुद्ध २-१ ले पराजित भएको हो । यससँगै थ्रीaस्टारले लिगमा सुखद शुरुवात गरेको छ ।

थ्रीस्टारका लागि रन्जन विष्ट र बुद्धले गोल गरे । पहिलो हाफमा एक गोल गरेको थ्रीस्टारले दोस्रो हाफमा थप एक गोल गर्दै २-१ ले जित निकालेको हो । थ्रीस्टारले पहिलो हाफको १७ औं मिनेटमा गोल गर्दै अग्रता लिएको थियो । 

१७ औं मिनेटमा रन्जनले उत्कृष्ट गोल गर्दै थ्रीस्टारलाई अग्रता दिलाएका थिए । उनले मध्येभागबाट डिफेन्सलाई बिट गर्दै लागेको बल पेनाल्टी क्षेत्रभित्रबाट उत्कृष्ट गोल गरेका थिए ।

खेलको चौथो मिनेटमा थ्री स्टारका पिटर सेगुनले गोल गर्ने अवसर गुमाएका थिए । लगत्तै पाँचौ मिनेटमा सुनील बलको फ्रिकिकमा रञ्जित धिमालको प्रहारले पोस्टको दिशा लिन सकेको थिए ।

१३ औं मिनेटमा फ्रेन्ड्सका कप्तान धिरज श्रेष्ठले पाएको अवसर गोलमा परिणत गर्न सकेनन् । ३७ औं मिनेटमा अजायी मार्टिन्सले पनि टाइट एंगलमा पाएको अवसर गोलको दिशामा पठाउन सकेनन् । ४२ औं मिनेटमा रन्जन पेनाल्टी क्षेत्रबाहिर लडाएपछि पाएको फ्रिकिकमा रञ्जितको प्रहार बाहिरिएको थियो ।

फ्रेन्ड्सका सरोज योन्जन लामाको फ्रिकिकमा गोलरक्षक एलन न्यौपानेले बल फुस्काएपछि गोललाइनमा विष्णु सुनारले क्लियर गरे । ६९ औं मिनेटमा बुद्ध फेरी गोल गर्नबाट चुके । पेनाल्टी क्षेत्रभित्रबाट सुनील बलको क्रसमा बुद्धको लो हेडर पोस्टभन्दा थोरै बाहिरियो ।

बुद्धले ८३ औं मिनेटमा अन्ततः गोल गरे । फ्रेन्डसको मिसपासलाई कन्ट्रोल गर्दै पेनाल्टी क्षेत्र बाहिरबाट गरेको उनको प्रहार डिफेन्डरलाई डिफ्लेक्ट हुँदै गोलमा परिणत भएको थियो । 

इन्ज्युरी समयको पहिलो मिनेटमा फ्रेन्डसका वैकल्पिक खेलाडी विकास लामाले गोल फर्काए । मैदान छिरेको ७ मिनेटमै उनले ६ यार्डमा बक्सभित्र अनमार्क रहेको अवस्थामा रिबाउन्ड बललाई पोस्टको दिशा दिएका थिए ।