मागियो सरकारले गरेको खर्चको हिसाबकिताब

सुर्खेत-कर्णाली प्रदेशसभाको सार्वजनिक लेखा समितिले सरकारले गरेको सम्पूर्ण खर्चको हिसाब किताब मागेको छ । बुधबार बसेको समितिको चौथो बैठकले सरकारको पारदर्शितामा प्रश्न उठाउँदै खर्चको हिसाबकिताब माग गरेको हो।

समितिका अध्यक्ष सांसद दिनबन्धु श्रेष्ठले दिएको जानकारी अनुसार सरकार गठनभएदेखि आजसम्मको खर्चको सम्पूर्ण हिसाव किताब माग गरेको हो। ‘आर्थिक वर्ष ०७४/०७५ मा सरकारले कुन योजनामा, के कति खर्च गर्‍यो त्यसको सम्पूर्ण जानकारी समितिले मागेको छ,’ श्रेष्ठले भने ‘सरकारको योजनाहरुमा भएको खर्च विवरण सार्वजनिक नगरेकोले समितिले खर्चको हिसाबकिताब माग गरेको हो ।’

त्यस्तै समितिले ‘कर्णाली रारा पर्यटन वर्ष २०७५’ मा सरकारले गरेको सम्पूर्ण खर्च विवरणसमेत माग गरेको छ। रारा पर्यटन वर्षको उद्घाटन र त्यसयता भएको मन्त्रालयगत खर्चको सम्पूर्ण विवरण १५ दिनभित्र सार्वजनिक लेखा समितिलाई बुझाउन माग गरिएको श्रेष्ठले जानकारी दिए।

श्रेष्ठका अनुसार समितिले आर्थिक वर्ष २०७५/०७६ मा कुन योजनामा के-कति खर्च भएको सोको जानकारी समितिले माग गरेको छ। ‘चालु आर्थिक वर्षको चार महिनासम्म सरकारले कुन योजनामा के–कति खर्च गर्‍यो ।’ श्रेष्ठले भने ‘मन्त्रालयगत रुपमा योजनामा छुट्याइएको बजेट समेत माग गरेका छौँ ।’ 

समितिको बैठकले ‘कर्णाली प्रदेश सार्वजनिक लेखा समितिको आन्तरिक कार्यविधि २०७५’ समेत पास गरेको छ । कर्णाली प्रदेश सरकारले गरेका खर्चको कुनै पनि विवरण पेश गरेको छैन।