एसिया छनोट : भुटानविरुद्ध नेपालले थाल्यो ब्याटिङ

काठमाडौं- आईसीसी विश्व टी–ट्वान्टी एसिया छनोट समूह 'बी' अन्तर्गत भुटानविरुद्ध नेपालले ब्याटिङ गर्दैछ । युकेएम वाईएसडी ओभलमा भुटानले टस जितेर फिल्डिङ रोजेपछि नेपालले सुरुवातमा ब्याटिङ थालेको हो ।  

अघिल्ला तीन खेलमा जित निकालेको नेपालले चौथो खेलमा आज (मंगलबार) भुटानसंग प्रतिस्पर्धा गर्न लागेको हो । भुटानविरुद्ध मैदानान उत्रदा नेपालको लक्ष्य लगातार चौथो जित निकाल्नु हुनेछ ।

तुलनात्मक कमजोर टिम भुटानविरुद्ध नेपाललाई जित निकाल्न गार्हो पर्ने छैन । अघिल्ला नतिजा हेर्दा नेपालले भुटानलाई सहजै हराउएको देखिन्छ । जारी प्रतियोगितामा भुटान प्रदर्शन उच्च देखिएको छैन । छनोटमा नेपाल ३ खेलबाट ६ अंक जोडेर शीर्ष स्थानमा छ । यता, भुटान ३ खेलबाट २ अंक जोडेर पाँचौ स्थानमा छ ।

नेपालले भुटानविरुद्ध अहिलेसम्म कुनैपनि खेल गुमाउनु परेको छैन । नेपालले भुटानविरुद्धको पाँच भेटमा चार जित निकालेको छ । एक खेल बर्षाको कारण नतिजाबिहिन बनेको छ ।

नेपालले पछिल्लो पटक भुटानसंग सन् २००६ मा खेलेको थियो । मलेसियामै भएको एसीसी ट्रफीपछि नेपालले १२ बर्षपछि भुटानसंग खेल्न लागेको हो । नेपालले उक्त खेलमा १८१ रनले जित निकालेको थियो ।

यस्तै नेपालले सन् २००३ को एसीसी इमार्जिङ टिम्स कपमा भुटानलाई ३५३ रनले पराजित गर्दा सन् २००४ एसीसी ट्रफीमा ९ विकेटले हराएको थियो । त्यस्तै सन् २००४ कै एसीसी ट्रफीको प्लेअफमा नेपालले भुटानलाई ८ विकेटले पराजित गरेको थियो ।