कार्डिफमाथि टोटनह्याम विजयी

वेम्वली (एजेन्सी)- इंग्लिस प्रिमियर लिग फुटबलमा टोटेनह्याम हस्टपर विजयी भएको छ । प्रिमियर लिगअन्तर्गत शनिबार राति भएको खेलमा टोटेनह्यामले कार्डिफ सिटीमाथि १-० ले विजय भएको हो ।
वेम्वली स्टेडियममा शनिबार राति भएको खेलमा टोटेनह्यामलाई जित दिलाउन खेलको एक मात्र निर्णायक गोल इरिक डाएरले गरेका थिए । उनले उक्त गोल खेलको आठौं मिनेटमा नै गरेका थिए । खेल अवधिभर थप गोल नहुदा अन्तत त्यही गोल नै टोटेनह्यामको जितमा पर्याप्त बन्यो ।

खेलको ५८औं मिनेटमा भ्रमणकारी टोली सिटी १० खेलाडीमा समेटिएपनि टोटेनह्यामले त्यसको थप फाइदा उठाउन सकेन । लुकास मौरामाथि अनावश्यक ट्याकल गरेपछि रेफ्रीले सिटीका राल्सलाई सोझै रातो कार्ड देखाउदै मैदान बाहिर पठाएका थिए । तर, १० खेलाडीमा समेटिएपनि कार्डिफले उच्च प्रदर्शन गरेको थियो ।

जितपछि टोटेनह्याम लिगको तेस्रो स्थानमा उक्लिएको छ । एक खेल बढी खेलेको टोटेनह्यामको ८ खेलबाट १८ अंक पुगेको छ । उसले चेल्सीलाई १ अंकले पछि पारेको हो । लिगको शीर्ष स्थानमा म्यानचेस्टर सिटी र दोस्रो स्थानमा लिभरपुल रहेको छ । 

दुवै टोलीको समान १९ अंक भएपनि सिटी गोल अन्तरमा शीर्ष स्थानमा रहेको हो । टोटेनह्यामसँग पराजित कार्डिफ २ अंक जोडेर लिगको पुछारमा यथावत छ ।