काठमाडौं– संघीय संसद् सचिवालय सिंहदरबार र संसद् भवन नयाँ बानेश्वरमा महिला सांसदलाई सुविधा दिने गरी स्तनपान कक्ष बनाइने भएको छ। संघीय संसद् सचिवालयले महिला सांसदको सहजताका लागि स्तनपान कक्ष निर्माण गर्ने भएको हो।
स–साना बच्चा भएका महिला सांसदलाई स्तनपान गराउन समस्या हुँदै आएको छ। सोही कारण सिंहदरबार र बानेश्वरमा स्तनपान कक्ष बनाउन लागिएको संसद् सचिवालयका प्रवक्ता एकराम गिरीले बताए। तातोपानी, बेडलगायतका सुविधायुक्त कक्ष बनाउन उपयुक्त कोठा छनोट गरेर तत्कालै काम थालिने उनको भनाइ छ।
स्तनपान कक्ष नहुँदा महिला सांसदलाई समस्या परेको, गाडीमा बसेर स्तनपान गराउनु परेको खबर सार्वजनिक भएपछि सचिवालयले स्तनपान कक्ष निर्माणका लागि पहल थालेको हो।
संसदमा भवन बानेश्वरको बैठक तथा संसद् सचिवालयमा हुने संसदीय समितिलगायतको बैठकमा लामो समय भाग लिँदा बच्चालाई स्तनपान गराउन महिला सांसदले समस्या भोग्दै आएका छन्।