राजविराज- स्रोत नखुलेको नेपाली तथा भारतीय रुपैयाँसहित प्रहरीले शनिबार एक भारतीय महिलालाई नियन्त्रणमा लिएको छ।
तिलाठी कोईलाडी गाउँपालिका-१ स्थित भन्सार कार्यालयको मूलद्वार अगाडिबाट भारत बिहारको कुनौली ग्रामपंचायत कमलपुर घर बताउने अस्मिताकुमारी साहलाई नेपाली र भारतीय रुपैयाँसहित नियन्त्रणमा लिइएको सप्तरी प्रहरीले जनाएको छ।
नेपाल र सशस्त्र प्रहरी तथा भन्सार कर्मचारीको संयुक्त जाँच टोलीले भारतबाट नेपाल प्रवेश गरेकी साहको साथबाट स्रोत नखुलेको ६ लाख ८३ हजार ३ सय रुपैयाँ र ५० हजार भारतीय (८० हजार नेपाली) रुपैयाँ गरी कुल ७ लाख ६३ हजार ३ सय रुपैयाँसहित नियन्त्रणमा लिएको हो। बरामद रकमसहित साहलाई कारबाहीका लागि आन्तरिक राजस्व कार्यालय इटहरी पठाइएको छ।