काठमाडौं– आगलागीमा परेर गम्भीर अवस्थामा पुगेका अछामको पञ्चदेव विनायक नगरपालिका–८ कोसेडीका दुई युवालाई थप उपचारका काठमाडौं ल्याइएको छ। प्रधानमन्त्री कार्यालयको पहलमा नेपाली सेनाको हेलिकोप्टरबाट उनीहरुलाई काठमाडौं ल्याइएको हो।
११ फागुनमा घरमै लागेको आगोमा परेपछि सोही ठाउँका २१ वर्षीय हिमराज रोकामगर र १९ वर्षीय पिरम रोकामगर गम्भीर घाइते भएका थिए। जिल्लामा उपचार सम्भव नभएपछि उनीलाई सुर्खेत अस्पताल रिफर गरिएको थियो।
घाइतेमध्ये हिमराजको शरीरको ८० प्रतिशत र पिरमको ३६ प्रतिशत भाग जलेको छ। सुर्खेत अस्पताललेसमेत उपचार गर्न नसक्ने र काठमाडौंको कीर्तिपुरस्थित वर्न अस्पतालमा लैजान सिफारिस गरेपछि पीडित परिवारले उद्धारका लागि पहल गरिदिन प्रधानमन्त्री पुष्पकमल दाहाल प्रचण्डसमक्ष अपिल गरेका थिए।
प्रधानमन्त्री कार्यालयले घटनाको संवेदनशीलतालाई दृष्टिगत गर्दै पीडितलाई तत्काल अस्पताल लग्न निर्देशन दिएपछि गृह मन्त्रालयको समन्वयमा सेनाको हेलिकोप्टरमार्फत घाइतेलाई काठमाडौं ल्याइएको प्रधानमन्त्रीको सचिवालयले जनाएको छ।