काठमाडौं- पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल, पोखरामा मुखभित्रको क्यान्सरको जटिल शल्यक्रिया गरिएको छ।
पर्वत जिल्लाका ५४ वर्षीय पुरुषको गत माघ २९ गते शल्यक्रिया गरिएको अस्पतालका निर्देशक प्रा.डा भरतबहादुर खत्रीले जानकारी दिए।
प्रा. डा. खत्रीका अनुसार ती पुरूषको मुखमा रहेको ५×५ सेमीको डल्लो तेस्रो स्टेजको क्यान्सर निकालिएको थियो।
प्लाष्टिक सर्जन डा. पियुष गिरीसहितको टिम र म्याग्जिलोफेसियल सर्जन डा.नारायण शर्मा लामिछानेसहित दन्त चिकित्सकको टोलीले १० घण्टा भन्दा बढी लगाएर शल्यक्रिया गरेको थियो। उक्त स्थानमा बिरामीकै बायाँ हातको मासु प्रत्यारोपण गरिएको थियो।
बिरामी ७ फागुनमा निको भएर घर फर्किसकेको शुक्रबार निर्देशक प्रा.डा.खत्रीले जानकारी दिए।