काठमाडौं– संघीय राजधानी रहेको काठमाडौं महानगरले वडावडामा बनाएको मेलमिलाप केन्द्रमा घर बहालका समस्या समाधानका लागि निवदेन दिनेको माग बढेको छ। वडा–२९ डिल्लीबजारमा गठन भएको मेलमिलाप केन्द्रमा घर भाडामा लिएर वर्षौंदेखि तालाबन्दी भएको, बहाल नतिरेको, बहालमा बस्नेलाई निकाल्नुपर्नेलगायत समस्या बढी आएका हुन्।
वडा सदस्य रेणु श्रेष्ठको संयोजकत्वमा गठन भएको केन्द्रमा आएका सयौं उजुरीमध्ये घर भाडासम्बन्धी विषय धेरै छन्। कोरोना महामारीका बेला डेरा छोडेर हिँड्ने अझै नफर्किएकाले कोठा खाली गर्ने निवेदन पनि उत्तिकैै रहेको संयोजक श्रेष्ठले बताइन्।
यो वडाका धेरै घरबेटीको आयआर्जनको स्रोत डेरा भाडा भएकाले पनि यस्ता निवेदन धेरै आएको हुन सक्ने उनको अनुमान छ। वडामा चार महिनाअघि केन्द्र गठन गरेर सामान्य समस्यालाई वडामै समाधान गर्न थालिएको हो।
वडामा मिलाउन नसकिएका समस्या मात्र महानगरको न्यायिक समितिमा पठाइने गरेको वडाध्यक्ष कुश ढकालले बताए। सामान्य समस्या वडामै समाधान हुन थालेपछि स्थानीय खुसी छन्। महानगरमा जान दूरी धेरै नभए पनि न्यायिक समितिमा धेरै उजुरी पर्ने गरेकाले धेरै समय लाग्ने गरेका कारण सामान्य समस्या वडामै समाधान हुँदा खुसी लागेको स्थानीय रमिला मिजारले बताइन्।