काठमाडौं– संघीय राजधानी रहेको काठमाडौं उपत्यकामा सार्वजनिक तथा निजी सवारीसाधन बढेसँगै साँघुरिएको सडक यातायात सुरक्षित बनाउन उपत्यका ट्राफिक प्रहरी कार्यालयले प्रतिघन्टा ५० किलोमिटरको गतिमा मात्रै सवारी चलाउन पाइने नियम सार्वजनिक गरेको छ।
कार्यालयले सूचना प्रकाशित गरी सवारी तथा यातायात व्यवस्था ऐन, २०४९ र नियमावली २०५४ मा उल्लेखित गति नियन्त्रणसम्बन्धी व्यवस्था र सडकको भौतिक अवस्थालाई दृष्टिगत गरी सवारी दुर्घटना न्यूनीकरण तथा रोकथामका लागि यस्तो नियम लागू गरिएको बताएको हो।
सवारी तथा यातायात व्यवस्था ऐन र सडकको भौतिक अवस्थासमेतलाई ध्यान दिएर गाडी तथा मोटरसाइकलको अधिकतम गति प्रतिघन्टा ५० किलोमिटर तोकिएको छ। उपत्यकाभित्र चक्रपथसँगै सर्भिस ट्रयाकका लागिसमेत गतिसीमा तोकिएबमोजिम कलंकी–कोटेश्वर सडक खण्डको ट्रयाकमा प्रतिघन्टा अधिकतम ५० किलोमिटर र सर्भिस ट्रयाकमा प्रतिघन्टा अधिकतम २० किलोमिटर गति तोकिएको उपत्यका ट्राफिक प्रहरी कार्यालयले जनाएको छ।
कोटेश्वर–भक्तपुर सडक खण्डमा समेत प्रतिघन्टा ५० किलोमिटर गति तोकिएको छ। तोकिएको मापदण्डभन्दा बढी गतिमा सवारी साधन चलाउने चालकलाई ऐनमा उल्लेख भएबमोजिम कारबाही गरिने सूचनामा उल्लेख छ।