'गल्ती एउटै हो नेपाल आएँ, यो देशमा थुन्नुपर्ने पहिलो मान्छे मै हुँ'

रास्वपा अध्यक्ष रवि लामिछानेले नेपाली मिडिया र पत्रकारहरूमाथि विभिन्न लान्छना लगाउँदै आफू नेपाल आउनु नै गल्ती भएको बताएका छन्। सरकारबाट बाहिरिने निर्णयबारे जानकारी दिन आयोजित पत्रकार सम्मेलनमा उनले यस्तो बताएका हुन्।

आफूसँग इमान भएको बताउँदै उनले नेपाल आउनु नै गल्ती भएको बताए। उनले भने, 'गल्ती त्यत्ति एउटा हो नेपाल आएँ। आउनेबित्तिकै पासपोर्ट बनाइहाल्नुपर्छ भनेर बनाएँ। दुरुपयोग गरेको छैन।' जसकारण यो देशमा थुन्नुपर्ने पहिलो मान्छे आफू नै भएको बताए। 

सम्पादक अरुण बरालले आफ्ना सम्बन्धहरूबारे लेखेकोमा पनि उनले आपत्ति जनाए। उनले आफूलाई चरित्रहीन देखाउनेले घरमा श्रीमतीले देख्ला भनेर बाटोमा ह्वाट्सएप मेसेज डिलिट गरेर जाने गरेको समेत गम्भीर आरोप लगाए।

उनले पत्रकारहरूको इतिहास बताइदिने बताए। उनले भने, 'मर्यादा पुरुष बनेर घर छिर्नेहरू जसरी आज मलाई चरित्रहीन देखाउनेगरी लेख्नुभएको छ। एक एकको लंगौटी उत्रिनेगरी देखाइदिने नाम रवि लामिछाने हो।' उनले आफूलाई नचलाउन समेत चुनौती दिए। उनले भने, "नचलाउनु मलाई, प्लिज लिभ मी एलोन। लेट मी वर्क। सक्नुहुन्न।"