नियात्राकार भट्टराईले ल्याए ‘आहा हिमाल’

काठमाडौं- नियात्राकार उत्तम भट्टराईले आफ्नो पहिलो कृतिका रूपमा ‘आहा हिमाल’ बजारमा ल्याएका छन्।

उनको नियात्रा संग्रह बिहीबार अन्तर्राष्ट्रिय नेपाली साहित्य समाजका अध्यक्ष राधेश्याम लेकाली, वरिष्ठ नियात्राकार युवराज नयाँघरे, लेखिका लाक्पा फुटी शेर्पा, नेपाल माउन्टेन एकेडेमीका कार्यकारी निर्देशक रोमनाथ ज्ञवाली, कृतिकार भट्टराई तथा रोजगार मिडियाका प्रबन्ध निर्देशक उद्धव भट्टराईले संयुक्त विमोचन गरे।

यात्रा साहित्य सबैभन्दा बढी पढिने विधा भएको र ‘आहा हिमाल’ले नेपाली पर्यटनका धेरै नदेखिने पक्ष समेटेको उनले बताए। कृतिको समीक्षा गर्दै नियात्राकार नयाँघरेले नेपालका हिमाल र हिमाली संस्कृतिको प्रचारप्रसारमा यो कृतिले अहं भूमिका निर्वाह गर्ने धारणा व्यक्त गरे।

लेखिका शेर्पाले ‘आहा हिमाल’ मार्फत् नेपालका हिमाल र यसको पर्यटकीय सौन्दर्यको गहिरो चर्चा भएको बताइन्। कार्यकारी निर्देशक ज्ञवालीले विश्व पर्यटन दिवसकै दिन ‘आहा हिमाल’ विमोचन गर्न पाउँदा खुशी लागेको बताए।

लेखक भट्टराईले आफ्नो कृतिमा नेपालका विभिन्न हिमाली क्षेत्रमा घुम्दाका अनुभूति समेटेका छन्। उनी पर्यटन, साहित्य र सञ्चार माध्यमसँग सम्बद्ध सामाजिक अभियन्ता हुन्।