बागमतीमा सरकार नबन्दै सभामुख र उपसभामुखको निर्वाचन

काठमाडौं– बागमती प्रदेशमा नयाँ सरकार बन्नुअघि नै सभामुख र उपसभामुखको निर्वाचन हुने भएको छ। सोमबार बसेको सर्वदलीय बैठकले बागमती प्रदेशसभाको सभामुख र उपसभामुखको निर्वाचन २८ र २९ पुसमा हुने मिति तय गरेको हो। 

प्रदेशसभाको पहिले अधिवेशन सोमबार दिँउसो १ बजे बोलाइएको छ। दिउँसो १ बजे बसेको सर्वदलीय बैठकले प्रदेशसभाको कार्यसूची र सभामुख र उपसभामुखको निर्वाचनको मितिसमेत तय गरेको प्रदेशसभा सचिवालयका प्रवक्ता मनोजकुमार गुप्ताले जानकारी दिए। सभामुख र उपसभामुखको निर्वाचनका लागि २७ पुसमा मनोनयन दर्ता गर्न मिति निर्धारण गर्ने सर्वदलीय बैठकमा सहमति भएको छ। 

प्रदेशसभाको बैठकमा दलीय रूपमा दलका नेताहरूले शुभकामना मन्तव्य राखिरहेका छन् भने निर्वाचितबाहेकका मन्त्रीहरूलाई पनि सदनमा आसनको व्यवस्था गर्न दलहरू सहमत भएका छन्। निर्वाचनबाट नयाँ संसद् आइसक्दा पनि प्रदेश प्रमुखले सरकार गठनका लागि आह्वान गरेका छैनन्।