कमेडी च्याम्पियन तेस्रो सिजनको अडिसन चाँडै

काठमाडौं– कमेडी रियालिटी शो ‘कमेडी च्याम्पियन’ तेश्रो सिजनको अडिसन अंग्रेजी नयाँ वर्षदेखि सुरु हुने भएको छ। सहभागी हुन चाहने प्रतिस्पर्धीहरुले जनवरी ११ देखि ३० सम्म अडिसन दिन सक्ने निर्देशक विशाल भण्डारीले जानकारी दिए।

पे वेल एप डाउनलोड गरेर आफ्नो भिडियो पठाउन सकिनेछ। भिडियोको लम्बाइ ५ मिनेटसम्मको हुने आयोजकले बताएको छ। हास्य क्षेत्रमा केही नयाँ गर्न चाहनेहरुका लागि यो शो उपयुक्त मञ्च मानिन्छ। यही शोबाट देशले केही नयाँ कमेडियन पाएको छ।

‘कमेडी च्याम्पियन’को पहिलो सिजन हिमेश पन्तले जितेका थिए भने दोश्रो सिजन भरतमणि पौडेलले। आयोजकले भिडियो प्राप्त गरेपछि उत्कृष्टलाई छनोट गरेर फिजिकल अडिसनमा सहभागी गराउनेछ।

थ्रि प्रोडक्शन प्रालिले यो शो निर्माण गर्दै आएको छ।