बोर्डद्वारा चलचित्र सेन्सर प्रावधान संशोधन

काठमाडौं– चलचित्र विकास बोर्डले स्वदेशी तथा विदेशी चलचित्र जाँच (सेन्सर) का लागि सिफारिस लिन चलचित्रको सार्वजनिक प्रदर्शन हुने मितिभन्दा कम्तीमा ७ दिनअगावै दरखास्त पेस गर्नुपर्ने नियम परिमार्जित गरेको छ। बोर्डले संशोधन गरेको नियमअनुसार अब ४ दिनअगावै दरखास्त पेस गरे पुग्नेछ। ११ पुसमा बसेको बैठकले यो नियमलाई संशोधन गरेको हो।

यसैगरी सोही बैठकबाट बेलुकी ११ बजेपछि चलचित्र प्रदर्शन गर्नुपर्दा आवश्यक शान्ति– सुरक्षाको व्यवस्था सुनिश्चित हुने गरी प्रदर्शकले चलचित्र प्रदर्शन गर्नुपर्ने र त्यसरी उक्त समय चलचित्र प्रदर्शन गर्नुपरे प्रदर्शन गर्नुअगावै बोर्डलाई जानकारी गराए हुने निर्णय भएको छ।

यसअघि बेलुका ११ बजेसम्म सकिने गरी चलचित्र प्रदर्शन गर्नुपर्ने र त्यसपछि प्रदर्शन गर्नुपरे सम्बन्धित जिल्ला प्रशासन कार्यालयको स्वीकृति लिई चलचित्र विकास बोर्डलाई समेत जानकारी गराउनुपर्ने प्रावधान थियो।

नेपाली चलचित्र क्षेत्रका समस्या समाधान र यस क्षेत्रको हितका लागि विभिन्न संघ–संस्थासँग वार्ता, छलफल गर्न बोर्ड तत्पर रहेको अध्यक्ष भुवन केसीले बताए।