बाँके भूकम्पको उच्च जोखिममा

नेपालगञ्ज– बाँके भूकम्पको उच्च जोखिममा रहेको पाइएको छ। ४८५ वर्षयता पश्चिम नेपालमा ठूलो भूकम्प नगएकाले त्यसको जोखिममा पश्चिम क्षेत्र रहेको बेलायतको डोरमन विश्वविद्यालयले गरेको अध्ययनमा उल्लेख भएको भूकम्पीय विपद् तथा पूर्वतयारी आयोजनाका परामर्शदाता गेहेन्द्र बम बताउँछन्। 

अध्ययनअनुसार रुकुम क्षेत्रमा ७.८ रेक्टर स्केलको भूकम्प गएमा नेपालगञ्जका २१८ घर पूर्णरुपमा क्षति हुने आकलन गरिएको छ। पश्चिमको कुनै पनि क्षेत्रमा ८.६ रेक्टर स्केलको भूकम्प गए नेपालगञ्जका ३ हजार घरमा क्षति पुग्न सक्ने प्रक्षेपण गरिएको परामर्शदाता बम बताउँछन्।

उमपहानगरमा मात्रै ११ हजार ८०० बढी मानिस विपद्को जोखिममा रहेको बताइएको छ। यसबाट सबैभन्दा बढी ज्येष्ठ नागरिक, बालबालिका र अशक्त पीडित हुनेछन्। भूकम्पको जोखिम न्यूनीकरणका लागि उपमहानगरपालिका र आसपासका सहरी क्षेत्रमा भूकम्पीय विपद्को पूर्वतयारी तथा प्रतिकार्यका लागि स्थानीय तहलगायत सरोकार भएका संस्थाले योजना निर्माणमा जोड दिनुपर्ने उनको भनाइ छ।

जोखिम हटाउन उपमहानगरमा पूर्वतयारी तथा प्रतिकार्य योजना निर्माण अन्तिम चरणमा रहेको छ। यसअघि विभिन्न आठ क्लस्टर बनाएर छलफल गरिएको मस्यौदालाई टंगोमा लैजाने प्रयास भएको परियोजनाका अधिकृत शिव सुवेदीले बताए।

नेपाल रेडकस सोसाइटी नेपालगञ्ज शाखाका सभापति गोवद्र्धन सिंह भूकम्पीय जोखिमलगायत विपद्को सामाना गर्न स्थानीय सरकारको छुट्टै योजना हुनुपर्नेमा जोड दिन्छन्। नेपालगञ्ज उपमहानगरका प्रमुख प्रशासकीय अधिकृत शिवप्रसाद रिजाल विपद् जोखिम व्यवस्थापन र न्यूनीकरणको विषय स्थानीय सरकारको प्राथमिकताको विषय भएको बताउँछन्। यसअघि सहरी विपद् तथा भूकम्पीय पूर्वतयारी परियोजनाले परियोजना अन्तर्गत नेपालगञ्जका संकाटासन्न क्षेत्रको जिआइएस म्यापिङ गरेको थियो।–रासस