काठमाडौंको फोहोर व्यवस्थापन प्रभावित हुने

काठमाडौं– काठमाडौं महानगरले शुक्रबारदेखि एक सातासम्म उपत्यकाको फोहोर व्यवस्थापन प्रभावित हुने बताएको छ। महानगरले फोहोर बिसौनी स्थल सिसडोलदेखि बञ्चरेडाँडासम्मको करिब २ किलोमिटर बाटो मर्मत गर्नुपर्ने भएकाले आगामी एक साता काठमाडौं उपत्यकाको फोहोर व्यवस्थापन प्रभावित हुने जानकारी दिएको हो।

यसअघि फोहोर व्यवस्थापन गरिँदै आएकोे सिसडोलदेखि बञ्चरेडाँडासम्म करिब २ किलोमिटर बाटो मर्मत अगाडि बढाइएकाले आगामी एक सातासम्म उपत्यकाको फोहोर नउठ्ने भएको हो। सहरी विकास मन्त्रालयले फोहरका गाडी आउजाउ गर्दा बाटो मर्मतमा समस्या आएकाले महानगरलाई केही दिन फोहोरका गाडी नपठाउन आग्रह गरेको थियो। 

शुक्रबारदेखि काठमाडौं उपत्यकाका १८ स्थानीय तहको फोहोर व्यवस्थापनको काम महानगरका वातावरण विभाग प्रमुख सरिता राईले बताइन्। बाटो मर्मतकै कारण यसअघि पनि बिहान ४ देखि दिउँसो १२ बजेसम्म मात्रै उपत्यकाबाट फोहोरका गाडी अन्तिम व्यवस्थापनस्थलसम्म पुग्ने गरेका थिए।

महानगरले सूचना जारी गर्दै सोही अवधिमा आ–आफ्नो घर, पसल व्यवसायबाट उत्पन्न हुने कुहिने र नकुहिने फोहोरलाई सडक, चोक, सार्वजनिक स्थलमा नफाली घरभित्रै छुट्टाछुट्टै राख्न आग्रह गरेको छ। हरेक दिन उपत्यकाबाट १ हजार २०० मेट्रिक टन फोहोर सिसडोलमा व्यवस्थापन हुँदै आएको छ।