आजका अखबार : महाअभियोगको तयारीदेखि चालकको हड्तालसम्म

काठमाडौं- राजधानीबाट प्रकाशित राष्ट्रिय दैनिक अखबारहरुले न्यायाधीश दीपकराज जोशीलाई महाअभियोग लगाउने तयारी गरेको विषयलाई मुख्य समाचार बनाएका छन् । 

न्यायाधीश जोशीलाई महाअभियोगको तयारी शीर्षकमा आजको नयाँ पत्रिकाले मुख्य समाचार छापेको छ भने अन्नपूर्ण पोस्ट्ले पनि जोशीविरुद्ध महाअभियोग तयारी शीर्षकमा मुख्य समाचार प्रकाशित गरेको छ । 

सरकारको आग्रहविपरीत जोशी नियमित काममा फर्किएपछि सत्तारुढ दल नेकपाले महाअभियोग लगाउने तयारी गरेको हो । उनीहरुले प्रधानन्यायाधीशमा अयोग्य भएको ब्यक्ति न्यायाधीशमा कसरी योग्य हुनसक्छ ? भनेर प्रश्न उठाएका छन् । नेकापाका सयभन्दा बढि सांसद्को हस्ताक्षर संकलन भएको आजका पत्रपत्रिकाले लेखेका छन् । 

आजका केहि पत्रपत्रिकाले भने पेट्रोलियम ढुवानीमा चालकले गरेको अवरोधका कारण इन्धनको हाहाकार भएको, सवारी चालकको आन्दोलनका कारण दशैँको मुखमा उपभोक्ताहरु सास्ती खेप्न बाध्य भएको समाचारलाई पनि प्राथमिकताका साथ छापेका छन् । 

आजको नागरिक दैनिकले पेट्रोलियम ढुवानीमा चालकको अवरोध शीर्षकमा मुख्य समाचार छापेको छ भने अन्नपूर्णले चालकको घेराबन्दीमा उपभोक्ता शीर्षकमा खबर लेखेको छ । नयाँ पत्रिकाले भने दशैँको टिकट बुकिङ फेरि अन्योलमा परेको खबर पहिलो पृष्ठमा महत्वका साथ छापेको छ ।  

किर्ते गरी कम्पनी बिक्रि शीर्षकमा मुख्य समाचार छापेको आजको कान्तिपुर दैनिकले भने किर्तेको कथा लेखेको छ । किर्ते प्रकरणमा कम्पनी रजिस्टार कार्यालयका ६ कर्मचारी पक्राउ परेका छन् भने २ बरिष्ठ अधिकृत फरार रहेको समाचारमा जनाइएको छ । 

आजको कारोबार दैनिकले भने अग्रिम बुकिङ आज नखुल्ने शीर्षकमा मुख्य समाचार छापेको छ भने दु्रतमार्गको लागत १ खर्ब ३५ शीर्षकमा विशेष खबर लेखको छ ।

यसैगरि आजका पत्रपत्रिकाले अख्तियार दुरुपयोग अनुसन्धान आयोगको प्रमुख आयुक्तमा नवीन घिमिरे नियुक्त भएको खबरलाई पनि महत्वका साथ छापेका छन् ।