मुलुकी संहिताको विरोधमा चालक आन्दोलित: अछाममा हवार्इ फायर, नगरपालिका तोडफोड

अछाम- मुलुकी संहिताको विरोध गर्दे आन्दोलनमा उत्रिएका सवारी चालकहरुको प्रदर्शनमा बल प्रयोग गरेपछि प्रहरीले एक राउन्ड हवार्इ फायर तथा केही दर्जन अश्रु ग्यास प्रहार गरेको छ। संहिताको विरोधमा देशभर चालहरु आन्दोलित छन्। जसका कारण तीन दिनदेखि सार्वजनिक सवारी साधन ठप्प छन्। 

आक्रोशित प्रदर्शनकारीले नगरपालिकाको कार्यालय तोडफोड गर्नुका साथै नगरप्रमुखको गाडीमासमेत क्षती पुर्‍याइएको छ। 

भदौ १ गतेदेखि लागू भएको मुलुकी अपराध संहितामा सवारी चालकलाई सरकारले हत्याराकै अभियोग लगाउने गरी संहिता ल्याएको भन्दै उनीहरु आन्दोलनमा उत्रिएका हुन्। उक्त संहिताको परिमार्जनको माग गर्दै आन्दोलनमा उत्रिएका आन्दोलनकारीले नगरपालिका घेराउ गर्न खोज्दा स्थिति तवावग्रस्त बनेको थियो।

झडपबाट स्थानीय १९ वर्षीय शैलेश कुवँरको आँखामा गम्भीर चोट लागेकाले उपचारका लागि काठमाडौं लगिएको आफन्तले जानकारी दिएका छन्। नगरपालिकाभित्र प्रहरीसहित छलफलमा बसेको बेला गाडीमाथि तोडफोड भएको प्रहरी प्रमुख जनकबहादुर शाहीले जानकारी दिए।