कांग्रेस उपसभापति भन्छन्- जनता र संविधानप्रति प्रतिबद्ध व्यक्ति मात्रै राष्ट्रपति बन्‍न सक्छ

काठमाडौं- नेपाली कांग्रेसका उपसभापति पूर्णबहादुर खड्काले देश, जनता र संविधानप्रति दिल दिमागदेखि पूर्णरुपमा प्रतिबद्ध भएको व्यक्तिमात्रै राष्ट्रपति बन्न सक्ने बताएका छन्।

गैरसांसद र त्यसमा पनि गैरराजनीतिक व्यक्तिलाई राष्ट्रपति बनाउने चर्चा चलिरहेका बेला प्रधानमन्त्री एवम् कांग्रेस सभापति शेरबहादुर देउवाका विश्वासपात्र रहेका खड्काले कांग्रेसले राष्ट्रपतिको विषयमा कसैसँग पनि सम्झौता नगर्ने र गर्न नहुने बताए।

शनिबार बिहान सामाजिक सञ्जालमार्फत् उपसभापति खड्काले राष्ट्रपति को बन्ने चर्चाले गम्भीर बनाएको भनेका छन्। 'मेरो प्रष्ट धारणा छ - राष्ट्रपति- देश, जनता र संविधानसभाले बनाएको संविधानप्रति दिल-दिमागदेखि पूर्ण रुपमा प्रतिबद्ध हुनुपर्छ । यो कुरामा नेपाली कांग्रेस पार्टी कसैसँग सम्झौला गर्न सक्दैन, गर्नु हुँदैन,' खड्काले लेखेका छन्।