मलेसियामा पहिरो परी कम्तीमा २१ जनाको मृत्यु

काठमाडौं- मलेसियाको सेलान्गोर राज्यमा पहिरोमा परी मृत्यु हुनेको संख्या २१ पुगेको छ। पहिरोमा १४ जना बेपत्ता भएका छन्।

घटना सेलान्गोरको बताङ काली शहरमा रहेको शिविर नजिक भएको हो। शुक्रबार बिहान ३ बजे परिवार पालभित्र सुतिरहेका बेला पहिरो खसेको हो।

शुक्रबारदेखि माटोमुनी फसेकाको खोजीकार्य तीव्र पारिएको स्थानीय प्रहरीले जनाएको छ। शिविरमा रातभर बस्न ५१ वयस्क र ३० बालबालिकाले नाम दर्ता गराएको शिविरका प्रबन्धकले बताए।

मलेसियाली प्रशासनलाई उद्धृत गर्दै स्थानीय सञ्चारमाध्यममा ७०० अधिकारी राहत र उद्धार कार्यमा संलग्न रहेको र १४ जना अझै बेपत्ता रहेको खबर आएको छ। मृत्यु हुनेमा चार बालबालिका रहेका छन्।