राष्ट्रिय स्वतन्त्र पार्टीका सांसदलाई सञ्चार माध्यममा प्रतिक्रिया दिन रोक

काठमाडौं– रवि लामिछाने नेतृत्वको राष्ट्रिय स्वतन्त्र पार्टी (रास्वपा) का नवनिर्वाचित सांसदलाई सञ्चार माध्यममा बोल्न बन्देज लगाइएको छ।पार्टीले सबै सांसदलाई पदको सपथ नलिएसम्म सार्वजनिक सञ्चार माध्यममा बोल्न प्रतिबन्ध लगाएको हो। 

अहिले नै पार्टीको आधिकारिक नीति र विचार प्रस्ट नभएको, नयाँ सरकारमा हुने भूमिका खुलिनसकेको अवस्थामा सञ्चार माध्यममा अन्तर्वार्ता वा अन्य भनाइ नराख्न पार्टीले सांसदलाई निर्देशन दिएको छ।

४ मंसिरको निर्वाचनबाट संघीय संसदको चौथो शक्तिका रूपमा उदाएको रास्वपाका २० सांसद छन्। उनीहरू कसैलाई पनि अहिले सार्वजनिक मिडियामार्फत आफ्नो भनाइ नराख्न पार्टीले आन्तरिक बैठकमा निर्देशन दिएको हो। पार्टी सभापति रवि लामिछानेले सांसदका पछिल्ला अन्तर्वार्ता विवादित भएपछि नबोल्न निर्देशन दिएको बताइएको छ।