विषाक्त मदिराबाट बिहारमा २२ जनाको ज्यान गयो

काठमाडौं– छिमेकी देश भारतको छिमेकी राज्य बिहारमा विषाक्त मदिरा सेवनबाट २२ जनाको मृत्यु भएको छ भने अन्य २० जनालाई गम्भीर अवस्थामा अस्पतालमा भर्ना गरिएको छ। बिहारको सारण जिल्लाका तीन वटा गाउँमा उनीहरुको ज्यान गएको हो।

बिहारमा मदिरा उत्पादन, बिक्री र उपभोगमा प्रतिबन्ध लगाइएको छ। तर सरकारको अनुमति नलिई स्थानीय स्तरमा उत्पादन एवम् बिक्री हुने मदिरा पिएपछि उनीहरूको मृत्यु भएको सरकारी अधिकारीहरूले बताएका छन्। 

प्रहरीका अनुसार अस्पताल भर्ना भएका मध्ये धेरैले आँखाको ज्योति गुमाएका छन्। 

महिला समूहले मदिरा उत्पादन तथा बिक्रीवितरणविरुद्ध अभियान चलाएपछि बिहार राज्यमा ६ वर्षयता मदिरा बिक्री र उपभोगमा प्रतिबन्ध लगाइएको छ।

भारतको गुजरातमा पनि केही महिनाअघि विषाक्त मदिरा पिउँदा २८ जनाको मृत्यु भएको थियो भने ६० जना बिरामी भएका थिए। गुजरातमा पनि मदिरा उत्पादन, बिक्री र उपभोगमा प्रतिबन्ध लगाइएको छ।