काठमाडौंमा हुँदै एमालेबाट निर्वाचित सभासद्को जमघट

काठमाडौं– नेकपा एमालेले ४ मंसिरमा सम्पन्न प्रतिनिधिसभा तथा प्रदेशसभामा निर्वाचित सांसदहरुको भेला आह्वान गरेको छ। 

एमालेले ५ पुसमा काठमाडौको कमलादीमा भेला बोलाएको पार्टी प्रचार विभाग उपप्रमुख विष्णु रिजालले बताएका हुन्।

प्रतिनिधिसभासहित सातै प्रदेशका सांसदलाई भेलामा सहभागिताका लागि पत्राचार गरिएको उनको भनाइ छ। भेलामा सहभागीलाई पार्टीका शीर्ष नेताहरुले प्रशिक्षण दिनेछन्। 

एमालेबाट प्रतिनिधिसभामा प्रत्यक्षतर्फ ४४ र समानुपातिकतर्फ ३४ गरी ७८ जना निर्वाचित भएका छन् भने प्रदेशसभामा दुवै निर्वाचन प्रणालीबाट १६१ जना निर्वाचित भएका छन्। प्रतिनिधिसभा र प्रदेशसभामा एमालेका २३९ जना सांसद निर्वाचित भएका छन्।

निर्वाचन आयोगले ३ पुसमा समानुपातिक निर्वाचन प्रणालीबाट निर्वाचित सांसदलाई निर्वाचित भएको प्रमाणपत्र दिने कार्यक्रम सार्वजनिक गरेको छ।