नेकपा सांसदको नजरमा संविधानका चार गल्ती

काठमाडौं- सत्तारुढ दल नेकपाका सांसद यज्ञराज सुनुवारले नेपालको संविधानमा चार गल्ती औंल्याएका छन् । संविधान दिवसको उपलक्ष्यमा उनले यस्ता गल्ती देखाएका हुन्।

सुनुवारका अनुसार ती गल्ती सच्याउन संशोधन गरिनुपर्छ। उनले संविधानमा फाँसी र मृत्युदण्डको व्यवस्था हुनेगरी संशोधन गर्नुपर्ने बताएका छन्। उनका अनुसार बलात्कारी, भ्रष्टाचारी, नरसंहारकारीलाई फाँसीको सजाय हुनेगरी संविधानमा संशोधन गर्नुपर्छ। उनले सभ्य समाजमा दण्ड र पुरस्कारको व्यवस्था हुने भएकाले यसलाई संविधानमा व्यवस्था गर्नुपर्छ । भ्रष्टाचार विकासको बाधक भएकाले यसका लागि पनि संशोधन गरेर फाँसीको व्यवस्था गर्नुपर्छ ।

उनले संविधानमा देखाएको अर्को गल्ती हो जमिन व्यक्तिको नभई राज्यको हुनेगरी संशोधन हुनुपर्छ । यसका  लागि राज्यले जमिन व्यक्तिलाई भाडामा दिने व्यवस्था गर्नुपर्ने उनको तर्क छ। यसो गर्दा विकासमा अवरोध नहुने, एकै परिवारले हजारौं बिघा जग्गा ओगट्ने र बाँझो राख्ने परिपाटीको अन्त्य हुने, अनुत्पादक क्षेत्रमा लगानी कम हुने, उद्योग क्षेत्रमा लगानी बाँड्ने र रोजगारीको अवसर वृद्धि हुने उनको तर्क छ।

यस्तै, शिक्षा स्वास्थ्य र रोजगारीमा राज्यले ग्यारेन्टी गर्नुपर्ने व्यवस्था गर्नुपर्ने पनि उनले उल्लेख गरेका छन् । यसबाट धनी, गरिब सबैलाई यस क्षेत्रमा समान अवसर मिल्ने उनले उल्लेख गरेका छन् ।

सुनुवारले अगाडि सारेको अर्को महत्वपूर्ण पक्ष हो, सीमाको सुरक्षा । उनले  नेपाल–भारत सीमा जोडिएका ठाउँमा काँडेतार र पर्खाल लगाएर त्यस क्षेत्रमा सेना तैनाथ गर्नुपर्ने व्यवस्था गर्न अनिवार्य भएको उल्लेख गरेका छन् ।