संविधान दिवसमा कालो झण्डा देखाउने सीके राउतका कार्यकर्ता पक्राउ

जनकपुरधाम– संविधान दिवसको दिन संविधान विरोधी गतिविधिमा संलग्न रहेको भन्दै प्रहरीले सीके राउतका तीन दर्जन बढी कार्यकर्तालाई पक्राउ गरेको छ । 

राउत समूहले संविधान दिवसको विरोधमा जनकपुरमा आयोजना गर्न लागेको आमसभाभन्दा अगाडी नै उनीहरुलाई पक्राउ गरेको प्रहरीले जनाएको छ । 

प्रहरीले यसअघि मंगलबारै राउतका विश्वासी सत्यनारायण मण्डललाई जनकपुर–८ स्थित उनको घरबाट पक्राउ गरेको थियो । मण्डल राउतको स्वकीय सचिवको भूमिकामा काम गर्दै आएका छन् । त्यसैगरी प्रहरीले सप्तरी, रौतहट लगायतका जिल्लाहरुबाट पनि राउतका कार्यकर्ताहरुलाई नियन्त्रणमा लिएको बताइएको छ ।

राउत संयोजक रहेको स्वतन्त्र मधेश गठबन्धनले संविधानको विरोधमा ‘चलु जनकपुर, भरु जनकपुर’ अर्थात जनकपुर पुगेर संविधानको विरोध गरौँ नारा दिएर आमसभा गर्दैछ । यद्यपी आमसभास्थल कहाँ हुने यस विषयमा केहि खुलाइएको छैन् । विरोधसभामा राउतसमेत सहभागी हुने बताइएको छ ।

कार्यक्रम सफल पार्न राउतका समर्थक र कार्यकर्ताहरुले महिना दिनदेखि तयारी गर्दै आइरहेका छन् । उनीहरु गाउँगाउँ पुगेर घरदैलो अभियान, शैक्षिक संस्थाहरुमा विद्यार्थीहरुलाई संगठित गर्ने लगायतका कार्य गर्दै आइ रहेको बुझिएको छ । ‘चलु जनकपुर, भरु जनकपुर’ कार्यक्रम सफल पार्न राउत समर्थकहरुले गाउँगाउँमा पर्चा पम्पलेट समेत टालेका छन् ।

यता, प्रहरीले जनकपुरमा सुरक्षा व्यवस्था कडा बनाएको छ । विभिन्न चोकहरुमा प्रहरीको संख्या बढाइएको छ भने सादा पोशाकमासमेत प्रहरी परिचालन गरिएको छ ।