कञ्चनपुरबाट लागूऔषधसहित उपमेयरका छोरा पक्राउ

धनगढी- कञ्चनपुरबाट लागूऔषधसहित एक युवक पक्राउ परेका छन्। जिल्लाको पुनर्वास नगरपालिका–६ 'ङ' गाउँबाट सशस्त्र प्रहरीले खैरो हेरोइनसहित ३० वर्षीय पंकज पन्तलाई पक्राउ गरेको हो।

प्रहरीका अनुसार पक्राउ परेका ती युवक शुक्लाफाँटा नगरपालिकाकी उपमेयर कल्पना जोशी (पन्त) का छोरा हुन्। शनिबार दिउँसो सशस्त्र प्रहरीको पुनर्वासस्थित बर्डर आउट पोष्ट (बीओपी) बाट खटिएको टोलीले पुरानो उनलाई खैरो हेरोइनसहित पक्राउ गरेको थियो। भन्सारस्थित चेक प्वाइन्टबाट शुक्लाफाँटा नगरपालिका–११ कलुवापुर घर भएका पन्तलाई पक्राउ गरिएको हो।

उनको साथबाट २० दशमलव ४ ग्राम खैरो हेरोइन बरामद गरिएको प्रहरीले जनाएको छ। पक्राउ परेपछि उनलाई छुटाउन प्रहरीलाई विभिन्न ठाउँबाट दवाब आइरहेको प्रहरी स्रोतले जनाएको छ।

उनको साथबाट से ३ प ८६९१ नम्बरको मोटरसाइकल पनि बरामद गरिएको छ।