नेपाल रत्न पुष्पलाललाई, क-कसले पाए पदक ? (नामावलीसहित)

काठमाडौं- यसवर्षको नेपाल रत्न पदक पुष्पलाल श्रेष्ठलाई प्रदान गरिने भएको छ । संविधान दिवसको अवसर पारेर सरकारले मरणोपरान्त पुष्पलाललाई नेपाल रत्न पदन प्रदान गर्ने निर्णय गरेको हो । 

यस वर्ष राष्ट्रगौरव पदकबाट भने कोही पनि सम्मानित नहुने भएका छन् । उक्त पदकका लागि उपयुक्त पात्र नभेटिएको भन्दै सरकारले कसैको पनि नाम सिफारिस नगरेको जनाइएको छ । यसैगरी महाउज्ज्वल राष्ट्रदीप पदकबाट गजेन्द्रनारायण सिंह, अम्बर गुरुङ (मरणोपरान्त), सत्यमोहन जोशी र राष्ट्रकवि माधवप्रसाद घिमिरे सम्मानित हुने भएका छन् ।

सुप्रसिद्ध प्रबल जनसेवाश्री प्रथम श्रेणी पदकबाट प्रधानन्यायाधीश ओमप्रकाश मिश्र सम्मानित हुने भएका छन् । उज्ज्वल कीर्तिमय राष्ट्रदीप द्वितीय श्रेणी पदकबाट समाजशास्त्री तथा इतिहासविद् डा. बालकृष्ण पोखरेल, संस्कृतिविद् डा. जगमान गुरुङलगायत सम्मानित हुँदै छन् ।

संविधान दिवसको अवसर पारेर सरकारले राजनीतिज्ञ, समाजसेवी, कर्मचारी, कलाकार, साहित्यकार, डाक्टर, पत्रकार, खेलाडीलगायत ४ सय २१ जनालाई विभूषित गर्दैछ । यस वर्ष मान पदवी पदकबाट ३ सय ३३ जना, अलंकार पदकबाट ८७ जना र पदकबाट ८६ जना सम्मानित हुने गृह मन्त्रालयले जनाएको छ ।