धारा नेपालगन्ज म्याराथनको उपाधि खड्कालाई

बाँके– आठौं संस्करणको धारा नेपालगन्ज म्याराथनको उपाधि नेपाली सेनाको त्रिभुवन आर्मी क्लबका खड्गबहादुर खड्काले जितेका छन्।शनिबार नेपालगन्जमा भएको म्याराथनमा खड्काले निर्धारित दूरी २ घन्टा २० मिनेट २८ सेकेन्डमा पूरा गर्दै उपाधि हात पारेका हुन्।     

म्याराथनमा दोस्रो र तेस्रो आर्मीकै क्रमशः नरेन्द्रसिंह रावत र मोहनदेव जोशी भए। रावतले निर्धारित दूरी २ घन्टा २२ मिनेट २९ सेकेन्डमा तथा जोशीले २ घन्टा २४ मिनेट ३६ सकेन्डमा पूरा गरे। यसअघि सातौं संस्करणको धारा नेपालगन्ज म्याराथनको उपाधि एपीएफ क्लबका किरणसिंह विष्टले जितेका थिए।

उपाधि विजेता खड्काले १ लाख ५० हजार पुरस्कार प्राप्त गरे। दोस्रो भएका रावतले ६० हजार र तृतीय भएका जोशीले ३० हजार पुरस्कार प्राप्त गरे। यस्तै, आठौं संस्करणकै महिला हाफ म्याराथनको उपाधि बागमती प्रदेशकी सन्तोषी श्रेष्ठले जितिन्। उनी सातौं संस्करणकी समेत च्याम्पियन हुन्। उनले निर्धारित दूरी १ घन्टा १६ मिनेट ४१ सेकेन्डमा पूरा गर्दै ६० हजार पुरस्कार प्राप्त गरिन्।

सो म्याराथनमा दोस्रो भएकी अञ्जली चौहानले निर्धारित दूरी १ घन्टा २५ मिनेट १५ सेकेन्डमा पूरा गरिन् भने तेस्रो भएकी अञ्जु खड्काले १ घन्टा ३६ मिनेट ४४ सेकेन्डमा पूरा गरिन्। दुवै जनाले क्रमशः ३० हजार र १५ हजार पुरस्कार प्राप्त गरेको आयोजक क्रियटिभ ह्यान्ड्सका अध्यक्ष एवं नेपालगन्ज म्याराथनका संस्थापक टीएस ठकुरीले जानकारी दिए।

हरेक वर्ष ५ मंसिरमा आयोजना गर्ने गरिएको म्याराथन यस वर्ष प्रतिनिधिसभा र प्रदेशसभा निर्वाचनका कारण दुई साता पर धकेलिएको ठकुरीले बताए। प्रतियोगिता क्रियटिभ ह्यान्ड्सको आयोजना तथा क्रियटिभ गन्ज मिडिया एन्ड इभेन्ट म्यानेजमेन्टको व्यवस्थापनमा भएको हो।–रासस