काठमाडौं– कतारमा जारी फिफा विश्वकपमा इंग्ल्यान्डका डिफेन्डर ह्यारी मग्वायेरले आफ्नो टिम विश्वकपको सबैभन्दा बलियो टिम रहेको बताएका छन्।
प्रतियोगितामा उत्कृष्ट प्रदर्शन गर्दै क्वार्टरफाइनलसम्म पुगेको इंग्ल्यान्डले विश्वकप जित्ने आशा रहेको मग्वायेरको भनाइ छ। पत्रकार सम्मेलनमा उनले भने, ‘हाम्रो टिम अहिले धेरै मजबुत छ। सन् २०१८ को विश्वकपमा रहेका खेलाडीमा धेरै परिवर्तन आइसकेको छ। अहिलेको टिमले विश्वकप जित्न सक्छ। त्यसका लागि हामी सबै मानसिक रुपमा तयार भइसकेका छौं। यसपटक उपाधि घर लैजानेछौं।’
इंग्ल्यान्डले फुटबलमा पछिल्ला वर्षदेखि राम्रो प्रदर्शन गर्दै ठूला प्रतियोगिताको अन्तिम चारसम्म स्थान बनाउँदै आएको छ। इंग्ल्यान्डले सन् २०१८ को विश्वकपको सेमिफाइनल खेलेको थियो भने सन् २०२० को युरोकपको फाइनल खेलेको थियो। तर यो टिमले कुनै पनि प्रतियोगिताको उपाधि जित्न भने सकेन। इंग्ल्यान्डले अन्तिम पटक १९६६ मा फिफा विश्वकपको उपाधि जितेको थियो।