घाइते भएपछि विश्वकपमा नफर्किने तनावले रातभरि रोएको थिएँ: नेइमार

काठमाडौं– कतारमा जारी फिफा विश्वकपमा सोमबार राति प्रि–क्वाटरफाइनलमा दक्षिण कोरियालाई ब्राजिलले ४–१ गोल अन्तरले पराजित गर्यो।

प्रतियोगिताको पहिलो खेलमा सर्बियासँगको खेलमा चोटग्रस्त भएर मैदान छाडेका ब्राजिलका मुख्य खेलाडी नेइमार जुनियर प्रेरित खेलमा ब्राजिल कोरियाविरुद्ध पूर्ण रुपमा हावी भएको थियो। त्यसक्रममा नेइमारले एक गोल र एक असिस्ट गरेका थिए।

खेलपछि मिडियासँग कुरा गर्दै उनले घाइते भएको रात आफूले विश्वकप गुमाउँछु भन्ने डरका कारण रोएर बिताएको बताएका छन्। उनले भने, ʻआज हामीले राम्रो खेलेर जित्यौं, अब हामी उपाधिको एक कदम नजिक पुगेका छ्रौं। म टिममा फर्किएर अत्यन्तै खुशी छु। म घाइते भएको रात पूरै रातभर रोएको थिएँ। मलाई विश्वकप गुमाउँछु भन्ने ठूलो डर थियो। तर म चाँडै नै ठिक भएर मैदान फर्किएको छु र टिमलाई पूर्ण रुपमा सहयोग गर्नेछु।ʼ 

अब ब्राजिलले सेमिफाइनल प्रवेशका लागि क्रोएसिया विरुद्ध खेल्नेछ।