विश्वकपको समापनमा दीपिका पादुकोणले ट्रफी अनावरण गर्ने

काठमाडौं– जारी फिफा विश्वकप फुटबलको समापन समारोहमा बलिउड अभिनेत्री दीपिका पादुकोणले ट्रफी अनावरण गर्ने भएकी छन्।

फिफाको इतिहासमा कुनै विश्व सेलिब्रेटीले पहिलोपटक ट्रफी अनावरण गर्न लागेको खबर भारतीय सञ्चारमाध्यमले लेखेका छन्। अन्तिम खेल पुस ३ गते आइतबार लुसैल रंगशालामा हुँदैछ।

विश्वकप समारोहमा भाग लिन दीपिका चाँडै कतारतर्फ प्रस्थान गर्ने भएकी छन्। विश्व प्रतिष्ठित कान्स फिल्म फेस्टिभलमा जुरीको रुपमा सहभागी भएको केही महिनामै दीपिकालाई यो मौका प्राप्त हुन लागेको हो।

यसै साता जारी विश्वकपको फ्यान फेस्टिभलमा बलिउड अभिनेत्री नोरा फतेहीले नृत्य र गायन प्रस्तुत गरेकी थिइन्। फ्यानले दीपिका पादुकोणलाई शाहरुख खानको आगामी फिल्म ‘पठान’मा देख्न पाउनेछन्।