अस्थिर राजनीतिले खेल क्षेत्र पनि प्रभावित : नेता सिंह

काठमाडौं– कांग्रेस नेता एवं सभासद् प्रकाशमान सिंहले नेपालमा राजनीतिक स्थिरता नआएका कारण विकासले गति लिन नसकेको बताएका छन्। सोमबार नेपाल सेतेरियो कराँते केन्द्रीय शाखा डोजोले आयोजना गरेको कार्यक्रममा सिंहले संविधान कार्यान्वयन गर्न आवश्यक ऐन अभावका कारण विभिन्न सामाजिक, सांस्कृतिक, आर्थिकका साथै खेल क्षेत्रको विकाससमेत सोचेअनुसार हुन नसकेको बताएका हुन्।

संविधान कार्यान्वयन गर्न तीन वटै तहका सरकारलाई अधिकारसम्पन्न बनाएर लैजानुपर्ने भए पनि उचित कानुन बनाउन बाँकी रहेकाले सेवा प्रवाह सोचेजस्तो हुन नसकेको उनको भनाइ छ।

आगामी दिनमा सांसदको हैसियतमा संघीयता कार्यान्वयनका साथै तीन वटै तहका सरकारलाई अधिकारसम्पन्न बनाउन कानुन निर्माणमा पहल थाल्ने उनको विश्वास दिलाए।

समाजमा सकारात्मक ऊर्जा प्रदान गर्न खेल र खेलाडीले खेल्ने भूमिका महत्त्वपूण हुने सिंहले जिकिर गरे। सिंहले समग्र खेल क्षेत्रको विकासका लागि आफ्नो तर्फबाट सक्दो प्रयास गर्ने प्रतिबद्धता जनाए।