चोटग्रस्त नेइमार कोरियाविरुद्ध मैदान उत्रिँदै

काठमाडौं– कतारमा जारी फिफा विश्वकपको प्रि–क्वार्टर फाइनलमा आज ब्राजिल र दक्षिण कोरिया भिड्दै छन्। यस खेलमा ब्राजिलियन समर्थकका लागि खुसीको कुरा आएको छ। राती १२–४५ बजे सुरु हुने खेलमा ब्राजिलका नेइमार जुनियर मैदान फर्किने पक्का भएको ब्राजिलका प्रशिक्षक टिटेले बताएका छन्। 

पहिलो खेलमा सर्बियासंग खेल्ने क्रममा खुट्टाको जोर्नीमा चोट लागेपछि ३० वर्षे नेइमारले समूह चरणका दुई खेल गुमाएका थिए। खुट्टाको चोटका कारण धेरै खेल गुमाउने अनुमान गरिए पनि अहिले नेइमार ठीक भइसकेको टिमले बताएको छ।

‘उनी ट्रेनिङमा फर्किइसकेका छन्। आइतबार बेलुकादेखि उनी टिममा संलग्न भएर ट्रेनिङ गरिरहेका छन्। उनको खुट्टाको अवस्था खतारामुक्त छ भने कोरियाविरुद्धको खेलमा मैदान फर्किनेछन्,’ ब्राजिलका प्रशिक्षक टिटेले मिडियासँग कुरा गर्दै भने।

तर नेइमार मैदान फर्किए पनि ब्राजिलका अर्का महत्त्वपूर्ण फर्वार्ड ग्याब्रियल जिजस, डिफेन्डर एलेक्स टेल्सजस्ता खेलाडी चोटग्रस्त हुँदा बाँकी खेल गुमाउने निश्चित भएको छ।