मकैबारीमा मृत भेटिए प्रहरी

सुर्खेत- सुर्खेतमा एक जना प्रहरी जवान मकैबारीमा मृत भेटिएका छन्। जिल्ला प्रहरी कार्यालय घोराहीमा कार्यरत प्रहरी जवान अमरबहादुर बोहोरा सोमबार मकैबारीमा मृत अवस्थामा भेटिएका हुन्। 

गुर्भाकोट नगरपालिका-१२ तिकुनेको मकै बारीमा बोहोर मृत अवस्थामा फेला परेको जिल्ला प्रहरी कार्यालय सुर्खेतले जानकारी दिएको छ।

तिकुनेमै घर भएका बोहोराको घरदेखि एकसय मिटर टाढाको मकैबारीमा मृत अवस्था फेला परेको प्रहरी चौकी मेहलकुनाका सई सर्वोजित बोलेलीले जानकारी दिए। 

‘बोहोराको अनुहारमा निलो डाम जस्तो देखिन्छ तर शरीरका अन्य भागमा कहीँ कतै चोटपकट छैन्’, उनले भने ‘घटनाबारे केही भन्न सकिन्न।’ जिल्ला प्रहरी कार्यालय सुर्खेतका एसपी बसन्त रजौरेले घटनाबारे अनुसन्धान भैरहको बताए।