अाज विश्वकर्मा पूजा मनाइदैँ, यस्तो छ किम्बदन्ती

काठमाडौँ- कन्या अर्थात् आश्विन सङ्क्रान्तिका दिन सोमबार कालीगढले विश्वकर्माको पूजाआजा गरी विश्वकर्मा दिवस मनाउँदैछन् । फलाम र फलामजन्य सामाग्रीको पुजा अर्चना गरि विश्वकर्मा पूजा मनाइने गरिन्छ । 

आज कलकारखाना, उद्योग, ग्यारेजलगायतका विभिन्न ठाउँहरुमा भब्यताका साथ विश्वकर्माको पुजा गरिन्छ । वर्षदिनभरी काम गर्ने मेसिनरी सामानलाई आजको दिन आराम दिदै त्यसको पुजा गर्दा कार्यसिद्धिमा सहयोग गर्ने धार्मिक विश्वास छ । 

यस्तो छ किम्बदन्ती

द्वापर युगमा भगवान् कृष्णलाई राक्षसले दुःख दिएपछि विश्वकर्माले समुद्रको बीचमा ‘भेद द्वारका’ बनाइ लुकाएको धार्मिक विश्वास छ । एकै रातमा समुद्रको बीचमा ‘भेद द्वारका’ को निर्माण गरेकाले विश्वकर्मालाई सफल वास्तुविद्का रुपमा मानी त्यसै समयदेखि पूजाआजा गर्ने परम्परा बसेको नेपाल पञ्चाङ्ग निर्णायक समितिका अध्यक्ष एवं धर्मशास्त्रविद् प्रा डा रामचन्द्र गौतम बताए ।  

प्राचीन भारत वर्षका चारदिशाका रक्षक देवतामध्ये द्वारकालाई पश्चिम दिशाको रक्षकका रुपमा समेत मानिन्छ । विश्वकर्माले निर्माण गरेको ‘भेद द्वारका’ अहिले पनि भारतको गुजरात राज्यमा समुद्रको बीचमा रहेको विश्वास गरिन्छ । विश्वकर्मालाई वास्तु विद्याका विशिष्ट ज्ञाताका रुपमा समेत मानिन्छ । 

यही सम्झनामा नेपालका कालीगढले आज भव्यरुपमा विश्वकर्मा बाबाको पूजा गरी उहाँको विद्वताको सम्मान गर्ने र यसो गरेमा आफूमा पनि विश्वकर्माको गुण प्राप्त हुने विश्वासका साथ पूजा गर्दछन् । आजको दिनलाई वास्तुविद्ले वास्तु दिवसका रुपमा समेत मनाउने गर्छन् ।