एक्साभेटर खोलामा खस्दा चालक बेपत्ता

म्याग्दी- म्याग्दीको अन्नपूर्ण गाउँपालिका–४ नारच्याङस्थित नीलगिरि खोलामा एक्साभेटर खस्दा चालक बेपत्ता भएका छन् । 

नीलगिरि खोला जलविद्युत् आयोजनाको सडक निर्माणमा प्रयोग भएको बुद्ध कन्ट्रक्सनको बा२क ६००७ नंको एक्साभेटर  आइतबार साँझ खोलामा खसेर दुर्घटना भएको जिल्ला प्रहरी कार्यालयले जनाएको छ । 

सडक निर्माणस्थलदेखि करीब १०० मिटर तल खोलामा खस्दा एक्साभेटरका चालक तनहुँ भिमादका २२ वर्षीय कमल थापामगर बेपत्ता भएका प्रहरी नायब उपरीक्षक वीरबहादुर बुढामगरले जानकारी दिए ।  

प्रहरी नायब उपरीक्षक बुढाका अनुसार डोजरसँगै खोलामा खसेर घाइते भएका सहचालक अन्नपूर्ण गाउँपालिका–४ नारच्याङ्का १९ वर्षीय सागर पाइजालाई उपचारका लागि बेनी अस्पतालमा ल्याइएको छ । पाइजा पौडिएर खोलाबाट निस्किएका प्रत्यक्षदर्शीले बताएका छन् । 

खोलामा डुबेको अवस्थामा एक्साभेटर देखिएको र बेपत्ता चालकको खोजीमा प्रहरी, आयोजनाका कर्मचारी र स्थानीय बासिन्दा परिचालन भएका छन् ।